Oté

La pa zélu konmsa I fo anou !

Justin / 2 févrié 2015

La Rényon nan sèt dépité, nana kat sénatèr, nana ankor in dépit éropéin. Si nou lé pa roprézanté, nou sar pi roprézanté ditou. Mi vé pa dir tourt la bann i fé pa arien, mé mi trouv nana in bonpé i travay pa pou la valèr… Moin na souvnans madam Silaos la, sak la dépoz in projé d’loi pou vanj kont l’alkolism fétal : sa té in bon loi sa ! Mi souvien Paul Vergès épi l’ONERC : si sa la pa in bon konba ébin, koup mon bra i singn pa. Mé d’ot, kosa zot la fé mondyé ségnèr ?

La pa bann konba i mank pou améné La Rényon. An kontrèr nana ziska tro ! Konba po u la santé d’moun, konba pou lèv bann frin dsi nout l’ékonomi, konba pou ké nout lékol sé vréman in lékol libératris é in n’afèr pou bien form bann kréol. Nana pou fèr dann lojman, nana pou fèr dann transpor, nana pou fèr dsi kann, dannl’agrikiltir an zénéral, nana pou fèr pou libèr nout fors travay é pou détak tout bann lanspèk. Talèr i fo in diksyonèr mil paj pou dir sak na pou fèr.

Alor siouplé, shakinn pran inn-dé projé, amenn demoun avèk zot, épi batay dési pandan zot manda. Lo pèp rényoné sar rokonésans, mé la li sré rokonésan pou koué ? Pars zot la sjhanj lé shoz ? O ki d’babouk. Zot la ans-èrv de nou, pou ansèrv azot é in pé pou gonf zot pla. La pa zélu konms i fo anou !

In kozman pou la rout : « Bon manjé i fé dann vyé marmite ! »


Kosa sa i vé dir ? Sans prop in kizinyèz la viéyi èk son zoutiy donk li la pa pou tronpé ; li travay a la routine é son n’afèr i tonm dos. An zénéral, sa i vé dir i f opa zète bann métod lontan, bann manyèr fé nout bann zansète, épi bann gramoun sak i an souvien sak té i fé lontan. A kontrosans : i f opa krash dsi la modèrnité non pli, i f opa krash dsi bann nouvo métod. L’onm na la kapasité pou amélyor ali... ; Moin lé sir sa i di azot kékshoz ! Fé travay zot koko ! Fé bouy zot matyèr griz, é moin lé sir ké rant rant, ni pé tonm dakor rantre nou.


Kanalreunion.com