Oté

« La pasyans i géri la gal ! »

In kozman pou la rout

Justin / 6 désanm 2016

Sanm pou moin, sa in kozman lé bien akroshé dann l’éspri kréol. Pou kosa ? Sirman pars, shak ané, kan i ariv lo shanjmann sézon nana in kanpagn dsi la gal é kréol i avèy lo rantre-doi bann marmaye konm lé dsi l’fé. Pou kosa ? Pars sa in drol maladi : bann pti bébète i rant dsou la po épi i grat aou, i grat aou, san z’arété. Pou soigné lé pa si fasil é lé fasil pou atrapé. In sinp bonzour a la min i sifi. Mi koné pa si la pasyans i sifi pou gérir ali, mé sé sak in pé i pans… Astèr si ou nana problèm la vi, ou i pé dir la mèm shoz mé la plipar d’tan si ou sèy pa rézoud lo problèm san tardé, li vien pli grav - zoumine i arash étan pti. Donk, i fo pa fé in vérité san pour san avèk sa, pars boudikont, ou lé riskab ète lo viktime. Alé ! Mi lèss azot fé travaye z’ot koko la dsi, é ni artrouv pli d’van sipétadyé.


Kanalreunion.com