Oté

La pèst ou sinonsa lo koléra ? Inn é l’ot la pa bon mèm ! O sinonsa sé nout sistèm la pa bon !

Justin / 24 zwiyé 2015

Mi koné zot i suiv in pé l’aktyalité. Donk nana dé shoz, moin lé sir, zot la di romarké. An parmi so bann shoz-la, nana désèrtin z’antropriz dann danzé. Pou kèl rézon ? La pa pars zot lé mal ékipé, épi ké zot i tourn pa ron, mé pars zot lé pri dann in l’amayaz é lé difisil pou zot ansort azot.
Kèl l’amayaz ? L’amayaz larzan bien sir, l’amayaz lo profi, l’amayaz la konkirans déloiyal.

Zot i souvien l’antropriz SIB… Sa té i tourn bien sa ! Mé in zour la mézon mèr-mal nomé, pars in momon i tyé pa son z’anfan konmsa !- la désid arèt avèk son l’izine La Rényon pou ranplas par l’inportasyon son bann produi fé déor (dantifris, la krèm é tout lo tranbleman..) Zot i rapèl l’antropriz Giordano ? Tou d’in kou, èl la désid arète fé shof-lo isi La Rényon pou fé vnir lo mèm produi mé fé an déor.

Astèr nana l’antropriz COGEDAL. Sa i fé la farine pou ban boulanzri. A la boulanzri ! Sa i marsh bien koméla dan nout péi mé zot i profèr ashté la farine méyèr marshé. Tan k’a fèr, si i gingn ! Tèrla Maurice, i gingn fé la farine méyèr marshé. Akoz banna va priv azot lo marshé rényoné ? Konsèy réjyonal la déside zoué dsi l’oktroi d’mèr… goumant ali. Bann boulanzé lé pa kontan ! Huguette Bello galman. Pars do pin sar pli shèr é lo konsomatèr i fodra li pèy. Mé si i fé pa sa, l’antropriz i mor ? Pa sir, pars li osi li koné fé l’inportasyon... Non bann travayèr va tonm atèr é tout fason lo konsomatèr i fodra li pèy kant mè !
Alosr kosa i fo shoizir ? La pèst sansa lo koléra ! Inn é l’ot la pa bon !.. Sé nout sistèm ké la pa bon !


Kanalreunion.com