Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

La plas la fam dan nout sosyété

zedi 26 séptanm 2013, sanm Justin

Anons sa konm sa i poz in problèm ; oté Justin, alé koz èk Justine, out koté féminin, out monmon, out sèr, out fiy…
Si èl té ékri dann “Témoignages” zordi « la plas de l’om dan la sosyété », di amoin onètman koué ou i pansré.
Atansyon bann klisé ! Bon, alon fèr sinp ; pou moin, Justin, sé ki la fam ? Pou sa, ma koz a zot mon monmon.
Dabor, zot i pé dir a moin kosa papa noré ginye fé dan son vi san monmon ?
Din foyé, zot i mézir tout sak la fam i fé din zourné, pou sak i rès la kaz.
La myèn té i lèv gran matin, alime do fé dan la kizine, sof kafé, fé lo mayi sofé, binye lo bann marmay, abiy a zot po anvoy l’ékol…
Kan i ginye nonbrèz famiy, asèt in bout la toil, artrap masine a koud, fé le kabay, ziska l’inpérméab… lav linz, ropasé, rapiésé…
Ben, i ropoz pa don ? la nuit !
San konté tout bann z’anfan pou okipé, donn manzé, fé résit léson ; l’instriksyon rélizièz…
Konbyinn savoir fèr sa i roprézant ?
Mi di, la fam pilié la famiy ; pilyé la sosyété…
Mèt a èl an lèr ; fo èl i ginye pran résponsabilité an politik osi. Pou sa, alon partaz bann tas doméstik. Si bann z’om i pé angaz an politik, bann fam i doi parey avans koté nou…
Ou na dé péi, sé dé fam ki diriz zot péi. Rogard Brézil, Israèl (in tan), Birmani, Ind (Indira), Almagn.
Isi, nou na inn fam diriz in koléktivité… Mèr la komine na poin tro ; o fo in pé plis…
Ankor inn ti l’éfor nout tout ; oubli pa la parité ; sa lé konséyé partou.
Nout tout ansanm, fam konm bonom, alon pans sa sak instan nout vi piblik, sa lé inportan, l’égzanp pou nout bann z’anfan, la plas la fam dan la sosyété.

 Justin 


Inn modékri, inn ti lavi, inn komantèr ?

signaler contenu


Facebook Twitter Linkedin Google plus