Oté

« La politès lé né avan nou ! »

In kozman pou la rout

Justin / 3 séptanm 2016

An parmi lo bann kozman rényoné, nana ké mi èm é nana ké mi èm pa. Sak mi anparl zordi mi èm ali bien. Pou kosa ? Pars, pou moin, sa in n’afèr i ranfors la sosyété é i déklansh pa bann bataye initil. In moun bien élvé i aplik la politès é li abord le moun lo méyèr fason ké nana. In moun mal élvé li la poin sousi d’sa é li abord demoun lo pli mové manyèr ké nana é shak foi li di kékshoz ébin bataye la pa loin pou pété .I di souvan in moun mal-profité pou réspèk son bann paran la fé tout sak zot i pé pou son l’édikasyon. Astèr dizon la politès avèk lo savoir viv sé in pé topète-morète é sé konm in l’andui la sosyété la bézoin pou pa ké in konstriksyon i dégrène an plas. Antansyon sa la pa nout santiman mé plito nout l’abiyman pou prézant dann la sosyété. Alé ! Mi éstop tèr-la é ni rotrouv pli d’van.


Kanalreunion.com