Oté

La politik gouvèrnman ? In pansman déssi in békiy ! In cotère déssi in zanm dé boi !

Justin / 29 désanm 2010

Matante Zélida la ékrir Justin :
Mon shèr nové, mon spès salté,
in shif sé in shif ! Donk sak l’INSEE i done déssi la késtyonn shomèr lé vré. Lé vré nana 143.000 moun lé marké konm domandèr d’travay. Sa lé vré, mé kisa l’otèr. Méssyé Didier i sort été prézidan La Réjyon ? Donk la pa li. Prézidan Sarkozy ? Li débate solman pou tir anou dann malizé. Alor ? La pa li l’otèr. Kisa ankor, la fote ? La kriz. I fo bann rouj de fon le zyeu lé boushé pou pa oir in n’afèr sinp konmsa. Tok ! Pran sa pou toi.

Justin la fé pou répons :
Mon vyé matant k’i koz touzour la boush rouvèr,
zot nana touzour lo mo la kriz dann zot boush, konm in léspès monstré i gingn pa fou a-tèr. Mon défin papa té i di konmsa : konm nana inn koz pou la maladi, nana inn koz pou la maladi ékonomik in péi. Dan se ka la, i fo fèr in bon dyagnostik pou konète lo bon médikaman. Si lo médsin i oi pa pli loin ké lo boute son né, pour sir, li trouv ar pa la koz la maladi. Si li oi in pé pli klèr é in pé pli loin, pour sir li lé riskab trouv la koz lo maladi, donk lo médikaman k’i fo.
Pou La Rényon lé pli pir pars lo médsin i oi pa pli loin ké son bout né, épi li vé pa oir pli loin k’sa... La ni parl gouvèrnman La France dépi lontan. Sak li té i vé yèr, konm avan épi zordi ankor sé garde son baz dann l’oséan Indyin. Donkalor gard lo sistèm konm k’i lé, d’inn fason ou bien d’in n’ot. Biensir, li na son konplis sir plas… konm Didier Robert, l’UMP, é lé zot ankor… Sak i vé pa toush lo sistèm konm li lé, sak i vé pa toush zot lintéré partikilyé, é sak na la krint lo syèl i tonm déssi zot tèt, sa sé bann konplis.
Tanka sak i fé, mèm si sa in koute pa aryink in katsou, sé konm k’i diré in pansman déssi in békiy, in cotere déssi in zanm dé boi.

 Justin


Kanalreunion.com