Oté

La politik nana partou, toultan, si oui réflési bien !

Justin / 15 mé 2014

Moin lé touzour dan laktialité, anfin, mi ésay ; in nafèr mi viv zordi, i prozèt a moin pli loin, pli an avan ou pli an arièr, mé mon tèt la i fo li travay, na rien a fèr.
Donk an so moman mon loto lé an pane démarèr-lindui la brilé, lé naz (mi koné pa so mo ou i sort ?).
Konm mon modèl loto lé pa kouran, ék tout zot sistèm informatik, i fo egzaktoman lo bon référans, lo bon kod po déblok minm lo boitié dirèksyon ; sa sé lo boulo lo mékanisiin…

Mi pran lo kar ; koté moin, lé ékri a tèr an pintir maron si lo goudron : « BUS » ; pa dabribus, pa dékrito po donn a ou lèr lo bis va pasé.
Ek ma fanm, nou atann ; 10 minit, in kar dèr, 20 minit… madame sé dalime in sigarèt ; i di a moin, la él lé sir konm él la alime son taba, kar la i sar arivé ; vré toulbon, blizé frot lo mégo si lo mir an béton po étinn é ékonomiz touzour inn ti bout !
Dann kar mi koz ék sofèr ; normalman la poin lo droi ! Ou na 3 moun dan in kar 50 plas ; mi di a li : « mi fé d la politik ».
Prémié tour minisipal, mon kandida i kritik lo sistèm bus, gran gran kar i pas pratikman vid ; soley a ou, la pli a ou, bann moun i atann déor ; sa in nafèr i fodré amélioré.
Déziinm tour, lot kandida i di ziska,- konm na in gran bus i pas ék dé pélé troi tondu ann dan- : « sa, a partir dlindi, ni koup bis la an dé ; tro gran, i fé lanbouteiyaz po riin ; lo pri lo bann pasazé i débours i pay minm pa lo sofèr po son zourné, parl pa linvestisman lo matérièl ,karbiran… »

Sofèr la na répons : « po mèt in labri bis, i fo lakor lo propriétèr lo térin, i fo fé fir a mézir ; do moun i pran labitid lo bis, i fé zot lédikasyon ».
Sa lé vré, o débi ou va trouv do moun po kasé so bann lékrito.
La popilasyon i édik pa zot an in zour ; sa osi sé d la politik !
La politik nana partou, toultan, si ti réflési bien !

 Justin 



Inn modékri, inn ti lavi, inn komantèr ?



Bann modékri andann forom






  • Lé vré, la politik lé partou,, mi di même i ésèy konèt la koulèr out vot pou mié trak à ou,sa sé la movez politik, lo 10 mé lé pa loin, mé in pé i zoué enkor o zaprenti, mé na briz lo dernié sène ,tienbo ansambl .

    Mi rovien o bis, mi koné pa ousa ou pran lo bis , mé koté mi attend’ mi rokoné i mank zabris bis mé la pa konte lo bis lé plein toultan ,ouakrosse à ou pafoi pou pa tombé ! la pa toulmoun nana loto sé pou sa mi pense i fo travay lo plan déplaceman sériézman pa solmzavi bann exspésialist ! kom ki di na rien y ramplas lo térrin, la vré vie

    Article
    Inn modékri, inn ti lavi, inn komantèr ?


Kanalreunion.com