Oté

La politik, sa la pa in zé !

Justin / 12 octobre 2013

Kan moin té monitèr koloni, navé in zé té i konsist… « Kriké mésyé… kraké… ».

Ou na dis sèz, onz domoun ; in mizik i zoué, lo moun i tourn otour ; dék la mizik i arèt, lo moun i asiz si in sèz, na inn i rès dobout, li lé éliminé ; i anlèv in sèz é lo zé i kontinyé ; dis, nèf, uit, sèt… ziska inn ; lo dernyé la ginyé, a li vinkèr ; si sré in zéléksyon, a li lo mèr !

An so moman, sak mi wa, ou na onz sèz an politik, mé ou na onz persone ; na la droit, ou lèkstrèm droit, lo milyé droit (in pé konm fout-bal), lo santr, la gos, lèkstrèm gos…

Fo pa tou l’moun i vé in sèl plas. Ti pé pa zoué tou sèl ! Nou la bézoin tout sèz èk tout moun. La droit tou sèl, li pé pa mèn tout, a koz la gos la poin zidé ? La gos i ginye pa propoz son zafèr ? Li la fine diriz lo péi — nasyonal konm lokal — alor ?

Là nana i kasyèt déryèr radio ; dék li antan i parl son nom, li dékros son téléfone, li koz a lantèn, nou la fine ariv kèl épok ?

Li la poin travay po fé ; na poin in papyé po lir, po signé ?

Toué lé responsab, toué na dosyé po suiv ! Pa ryink ton bann zadjoin ? Toué osi toué lé atelé, i fo ti tir lo sarèt ; toué lé in rou d’sékour ?

Talèr, in kou d’boul, toué va tonm konm in mok.

Ti pé pa bouzé konm dan mon zé, sèz tournant ; poz ton déryèr kèkpar é travay.

Na in moun la di, vo myé avoir un ènmi intélizan kin ami kouyon ; o moin lènmi ou i koné a ki ou na afèr, alor ke in ami, si ou koné pa si ou i pé konté, tansyon danzé, tansyon traïzon !

La politik, sa la pa in zé dé d’mok ou zé d’sèz tournan !

Justin


Kanalreunion.com