Oté

La povreté, mé sé koué la povreté o just ?

Témoignages.re / 11 septembre 2013

Kan moin lété pti marmay l’ékol, mi éstim moin lété pov pars moin té i dor dann ti kaz an pay kann konstrui su gro tron d’jak anfonsé dan la tèr po tiin dann siklone ; ladan lavé payas goni, navé lo pis ; kan moin té dor pa bien, papa té i di : « Ou la pa dormi, mé out kor la repozé ! » alor, mon mèt i di : « z’anfan, si zot i trouv zot lé pov, agard dan zot l’androi si zot i trouv pli pov ké zot ; si zot i trouv pli pov ké zot, sa i vé dir ké zot lé pa tro pov ! », alé èk sa ; astèr, mi fé in tour dan mon tèt po war ki lé pli pov ké moin dan mon vilaz !

Moin la trouvé !

Pars moin, moin lavé papa, monmon, inn ti kour, poul, bèf, koson, in fami frèr èk sèr. Lo vié lavé in sarèt, i travay kolon, i ral gongon, mé i giny la vi !

Pli ba k’la kaz, na in matin, 8 èr a pé pré, dan in fami, lo papa la mèt la kord dan in pié d’zavoka ; lo monmon tou sèl, lo 5, 6 z’anfan, fini gran 6, 8, 10 ziska 18 l’ané, sa i travay pa, i trinn par isi, in trinn par la, sa i vol in zak la kaz inn, goyav lot koté ; na in soir moin la ziska trouv lo pti dernié la pré dormi dan mon kuizine.

Vréman, sa té d’moun pli pov ke moin ; i konsol ou sinon sa i andor ou santiman la soufrans.

Zordi, bann z’Étazuni la défini in sey povreté : dé-troi dolar par zour par moun kome rèst a viv kan ou la fine tir tout out bann factir lo, l’éléstrisité, loyé é konsor.

Mé na ankor plin domoun, spésyalman La Rényon, i viv an d’sou d’sa ; 20 sèf d’Éta an 2000 la di, an 2015, zot i vé la grand povreté i disparé su la planèt ; la Frans osi la signé ; alon domann son prézidan sinon sa lo François Chérèque ki vyen isi le 29 sèktanm sèt ané po okip sa, koué zot i kont fé po siprime l’èkstrèm povreté La Rényon ! Avan 2015 !

 Justin 


Kanalreunion.com