Oté

La protéksion l’anvironman :
Nou lé pi dan l’avan-gard,
mé dsi lo bout la ké !

Justin / 26 décembre 2012

L’Antartik, zot i koné kosa i lé ? In pé i apèl sa lo Pol sid. In gran kontinan, mé la plipar d’tan, li lé rokouvèr avèk la nèz épi la glas. Pou konbienn tan ? Sa ni koné pa, pars la glas épi la nèz i fonn, é i fonn plizanpli vit par la fot lo réshofmann klima. Sa i pé intérès anou sa ! Pliské mon bann dalon ! Pars la glas i done dolo é dolo li goumant lo nivo la mèr. Konm l’Antartik lé dann sid l’oséan Indien, zot i konpran, ni pé pa fé konm si sa i intérès pa nou, konm si sa i konsèrn pa nou... Poitan, isi La Rénion, i mank pa dmoun konm sa. Domoun soi-dizan informé, mé i pans arienk gaskoné kan Paul Vergès i anons in vré danjé. Mi souvien zot mank réspé kan nout kamarad, an plin dann in konpagn z’éléksion, la anons l’éshofman klimatik. Inn-dé zournalis la droit la ziska fé konm si zot i kroi nout kamarad la tèt i komans gaté. Kosa l’ariv apré ? Nout tout i koné, é lo bann gran grèk, sof mon réspé, la anval zot vomi.
La pa arienk sa, Paul Vergès lé pa solman lo moun i anons danzé, sé galman — avèk son parti épi l’Alians — lo moun i domann k’i fé dé shoz, lo moun i pran bann l’inisiativ. Pou sa mèm, toultan ké li té prézidan la Réjion, La Rénion lété an avans dsi la késtionn la protéksion l’anvironman. Kan té i pran in l’inisiativ pou in l’aksion an favèr la protéksion l’anvironman, La Rénion té soi an avans, soi èl té i rant dann trin. Malérèzman, nou lé randi bien ba dopi Paul Vergès lé pi prézidan. Pa pli loin ké dann zournal lindi, na in nouvèl intérésan : in l’ékspérians pou déplas dan l’intérièr la tèr in l’instalasion an danzé — kisoi in dig, kisoi in pon, kisoi in rout par rapor nivo la mèr i mont. Na sink l’ékspérians l’apré fé, é riyin ditou pou La Rénion... Zamé dann tan Paul Vergès té anlèr, in n’afèr konm sa nora éspasé. Nou lé pi dan l’avan-gard, nou lé fine ariv dann bout la ké.

Justin


Kanalreunion.com