Oté

La rash son kro, l’arash son dan... mé prépar touzour larzan !

Justin / 8 séptanm 2010

Lékip de France la gingn son match kont la Bosnie. Tan myé pou èl, tan myé pou toute sak i suiv foutbal épi i èm so lékip-la. Éspéron la fine sorte dann tourniké la défète. Éspéron la fini avèk lo tan Domenech.

Domenech lisansyé !

Konm in azar, i sorte aprann la Fédérasyon la lisansyé Domenech. Sirman pars li lé fine izé, lo pov boug, sirman ossi pars bann moun la Fédérasyon i vé fé siporte par inn-dé zot prop sabotaz, par dé-troi zouèr épi par lo lantrénèr. Mé, par l’fète, akoz sa i ariv plis dé moi apré ? Pars banna la ézité ? Sansa, sa in konbine ankor ? Pou kossa mi di sa in konbine ? Pars si ou la fé in fote dann travay, kan oute patron i koné, li nana dé moi d’tan pou pran in désizyon kont ou. Si i lèss pass lo dé moi, i gingn pi fé aryin. Baz in lisansiman la-dsi, sé konm si li la poin in koz réèl épi séryèz. Sé pran lo risk fé kondane aou par tribinal Pridome.

Éstèr kossa i sar éspassé ?

Pour sir lo Domenech v’alé d’van Pridome é Pridome lé riskab kondane la Fédérasyon vi k’zot la pran zot désizyon tro tar, sé konm si lo boug la pa fé d’fote, ni grav ni aryin. Sé lo Kode la loi déssi lo travay k’i vé sa. Somanké lo boug va gingn plizyèr santène milyé l’éro ? Lo préavi, lo konzé péyante, lo domaz-intéré. Sa i fé larzan sa. Sansa va négosyé pou lo mèm rézilta. Anfin ki vivra véra !

Konm di lo konte, l’arash son kro, l’arash son dan mé prépar touzour la monante.

Justin


Kanalreunion.com