Oté

La Rényon : in péi i port bien son nom ?

Justin / 16 octob 2015

La Rényon ! koman l’ariv nom-la ? Par l’fète ni koné pa tro bien. Ni koné kan l’ariv La révolisyon fransèz é ké té i fo débatiz l’il Bourbon momandoné lo l’asanblé la-ba dann Pari, té i doi diskite dsi nout l’ansien nom pou shanj ali. Mé ni koné pa pou kosa la désid donn anou nom-la…

Ni sar pa diskite dé sa zordi, mé ni koné, pou in bonpé d’moun é sirtou pou la propagann ofisyèl La Rényon i port bien son nom. Moin pèrsonèl mi pans nana pou diskité. Pou kosa ? Pars konm mi oi lé shoz dopi in bon koup de tan, mi san pa La Rényon konm in péi bien ini. Ni dann son yèr, ni dann son koméla é ni pé dir parèy pou son domin. Pétète apré ! Pars yèr nou la koni l’ésklavaz, sistèm l’angajé, sistèm kolonyal, sistèm gro blan é koméla, dann sak i apèl lo tan post kolonyal l’inité nout péi i lès a déziré. La politik bann gouvèrnman, dopi 1946 la pa parti dann sans-la.

Zot va dir, i vo myé viv isi ké dann d’ot péi i pass souvan dann l’aktyalité. Moin lé dakor, nana pli pir ké nou é konm la lès amoin lo shoi sé kant mèm isi ké moin la viv, ké mi viv é ké sé la ké mi vé, domin rann mon dèrnyé soupir. Mi pans sa lé vré pou in bonpé d’moun isi mé zour-la, si mon l’éspri i tourn ankor in pé ron moin va partir avèk in rogré.
Lo rogré ké La Rényon i port pa pou vréman son nom san-pour-san.


Kanalreunion.com