Oté

La Rényon lé andémik ?

Justin / 4 zwiyé 2015

Kan sa ni pé di, in léspèss lé andémik ? Kan li lé partikilié èk, kiswa in landrwa, kiswa in rézyon. Li lé andémik kan néna in nafèr lé a li sontousèl, néna solman a so landrwa la, na pwin ayèr, néna ryink la. Pou nou la Rényon ni pé di konm sa, nou néna pié d’bwa andémik, nou néna Tamarin dé o, ryink nou néna, nou néna bwa d’Ranpar, ryink nou néna, nou néna bwa Golèt, bwa d’Osto, bwa d’Arnèt… bwa d’Afoush, etc. Sa sé nout trézor, vik nou tousèl néna, donkalor, odrémié byin okipé, byin antrotonir, byin vèy dosi.

Malorozman pa solman dan so dominn la nou lé andémik. In pé i di dan lo dominn shomaz osi nou lé andémik. Nou lé tousèl a an awar. Bin voui, è knout 30 pour san shomèr, 170000 si mi tronp pa, kisa néna plis ké nou, an poursantaz mi di, dan tout la frans èk tout départman outromèr, sé nou néna lo pli for to, sépousa lé éspésyalis i di, nout shomaz sé in shomaz andémik. In shomaz andémik i akab plis bann jèn i di, diplomé a ou, san diplom a ou, sak néna léspéryans, sak na pwin, tout.

Ala in ot dominn ousa no lé andémik osi, sé dan nout kontinité téritoryal. Nou sé la sèl rézyon do frans ki pèy biyé pou alé bat karé déor. Néna i pran in biyé pou alé ziska marsèy aprésa inn ti krwasièr dann la méditérané. Lé vré i pé pérmèt in pé rotrouv la famyi tanzaot si tousala lé kontrolé. Néna in gro bidzé pou sa, 31 million i di. Ek tousala larzan, mi apran zordi la rézyon Rényon lapré ral lo kont pou anvoy 400 étidian fé zétid la ba déor. Ziss in ralé pousé par rapor zéléksyon fin d’lané mi krwa. Pié d’bwa andémik in shans, shomaz andémik ni siport, la rézyon andémik ziska désanm !


Kanalreunion.com