Oté

La Rényon na lo droi dévlopé Sansa na poin lo droi

Justin / 15 octob 2010

Moin na rogré, La Rényon lé pa in pé pli dévlopé. Tansyon ! Sa i vé pa dir nou lé dann fénoir konplé. I vé pa dir, zordi ankor, ni viv konm dann tan moiyénaz. La modèrnité la fine ariv ziska nout ti-galé dann l’oséan Indyin. Ni an profite dé sa... solman tro souvan konm konsomatèr, pa assé konm prodiktèr.

Konm in l’anvi d’boujé
Pandan plis troi syèk lo pakt kolonyal la anpèsh anou dévlopé. Mèm in klou la koloni l’avé poin lo droi produire dann tan-la. Dépi la loi 1946, épi apré dépi nout péi lé réjyon, i diré nou la konm vouli karte nout zèl pou pran lo vol. Bann prézidan la Réjyon, gosh konm droite, i diré té i vé mète nout péi dann train dévlopman. Kan prézidan Sarkozy la fé son diskour sis novanm 2009, nou la pans l’État li ossi i vé ankouraz anou dann shomin dévlopman.

In késtyon byin sinp
Zordi, ni karkiy nout zyé épi ni rogarde nout bann shantyé an démolisyon. Okilé nout tram-train ? Okilé nout l’indépandans énèrzétik ? Okilé nout dévlopman andojène ? Ousa i lé La Rényon konm modèl dévlopman dirab ? Kèl l’éspoir nou nana pou dévlop nout péi ? Okilé, nout l’avans dann lénèrzi prop ? Zédi dann Paris, i paré la sign in nouvo protokol Matignon. Avan sign sa, lo roprézantan gouvèrnman, épi lo prézidan la Réjyon, noré du poz azot in késtyon. In késtyon byin sinp. La Rényon vin-té-inyèm syèk na lo droi dévlopé, sansa na poin lo droi ?

Justin


Kanalreunion.com