Oté

La Rényon nou na tout…lo rèv amérikin !

Justin / 19 avril 2014

1) La Rényon nou na tout… ékout radio ; koué oui antan pa ?

Lot zour la dépas lé born : ma éséy dèt klèr : novanm2012, in fanm i fé vol a él son mersédès ; pliz égzaktoman, él lé résponsab in magazin ; in boug ki doi él i pay par sèk ; plizir sèk ; lo sèk lé minm pa sou son non ; lo fanm i dépoz la bank ; inn foi : san provizion, dé foi : san provizion : lo bank i komans prévnir lo boug ; koué lo boug i fé ? Li viin kanbriol lo fanm po sézir lo bann sèk konm sa li lé pi anmerdé par la magazinièr ; an pasan li vol lo mersédès ; mé, li démont é li vann par piès… pliz égzaktoman, li ardonn in boug li doi larzan ; konm lo boug i vann piès loto lokazion, li arginy rofil lo zafèr si lo marsé ; in léspès marsé noir, trafik sèk, trafik piès loto, i pèy an natir ; in véritab karousèl, in mikmak, ti konpran pi ou sa i fo tourn la tèt ; fanm la la port plint ; bayoun, i fodra bann ziz la nana la tèt po aromont lo fil Ariane !
La Rényon nou na tout.

2)Lo rèv amérikin.

1994 : moin lé interviouvé si RFO po in kasèt séga maloya ; moin lé an vakans Polynèzi ; Dédé i fé in lartik si moin ; i donn mon téléfone ; moin té an formasyon Diréktèr Koloni vakans ; mi giny in koud fil, in mésié i roprézant in produi amérikin (kosmétik, parfin, tousala…) ; li vé war a moin ; èk in fran (a lépok, navé poin léro) par tib la krèm, bénéfis propr, par zour, an dé zan, troi zan, moin sra fine ariv milionèr an dolar amérikin.
Minm soz zordi, 20 tan aprè ; an plin karo zakasi, inn ti madame i ariv ; él i vé fé in rényon la kaz ék son produi (aloès=shoka) ; paréy lot ; pomad po la po ; prostat ; doulèr ; dizesyon tout zafèr.
El i parène ; ék dé troi parènaz, él i ogmant sé poin…
Bayoun, i fo vréman ou na poin arien po fé ! Lo rèv amérikin !

 Justin 


Kanalreunion.com