Oté

La Rényon sé nout dénominatèr komin !

Justin / 27 octob 2015

Boudikont, zordi, nou lé asé a lèz blèz sanm linyon èk nout bann kamarad di Progré pou zéléksyon rézyonal. Linyon PCR-Progré ousinon Progré-PCR, konm ni vé. Lé vré pou désertin, ni koné a nou dopi lontan san pou vréman pran lo tan ésanzé, sansa omwin pou argard si ni pé antropran ansanm, antropran, pou nout Rényon nouvèl konm ni prétan. Firamézir, konm di bann la ot, mi san konm si nou néna inn-dé dénominatèr komin rant nout dé.

Nout kandida li minm i prétan èt daborinn Rényoné sosyalis é konm nou, nou lé plito Rényoné kominis, sanm pou mwin, ala déza in bon dénominatèr komin rant nou. An promié, lonm Rényoné. Li di osi, pou rovwar nout léstati, li lé dakor pou atak lalinéa 5, lartik 73. La d’si nou lé ansanm avèk san pour san. Ankor, pou nout léstati li di “pronons lo mo lotonomi, i fé pa pèr a li zordi“. I tonm byin, nou la zamé i pèr. Nout rol domin dan la zonn ? Néna zis lépésèr in papié sigarèt rant banna ék nou.

Sépousa sokousi anon pran lo tan kozé. Ankor in nafèr i pé mèt a nou dobout ansanm, nout shomaz, koman sobat nout shomaz ? nout kandida la di èk nou “lé dé gran sérvis i pé èt in gran rosours“. Sanm pou mwin, pou ropran in kozman bann la ot touzour, sak i ini a nou lé pli bandé ksak i diviz a nou. Pou lo rès, konm di mon dalon di nor, anon fé travay nout koko, fé bouy nout matièr griz, zot va war a la fin rant rant na tonm dakor.


Kanalreunion.com