Oté

La Rényon sé pi La Rényon alor ?

Justin / 5 out 2015

Matant Zélida la ékrir Justin :

Mon shèr nové, mon spès salté, rouj-de-fon dovan l’éternité,
Ankor in foi, zot i mète azot dé koté par rapor lé z’ot. Kan lé z’ot i trouv arien pou krétiké, zot lé la pou krétiké. Kosa mi vé dir par la ? Mi vé dir kan lo délégasyon komor la kite lo zé l’oséan indien, près toulmoun la donn azot tor. konm lo minis La Frans la di-in minis la gosh mi rapèl aou !- lé normal bann ésportif Mayotte i défil déyèr lo drapo fransé. Mi rapèl aou galman la mazorité bann rényoné dsi internet épi dann bann radio la donn tor bann komor. Donk d’apré bann rouj na arienk bann komor na rézon, tout lé z’ot na tor. Akoz tout lé z’ot délégasyon la pa di in sèl mo dann z’ot sans ? Akoz ? Pars zot na tor é bann rouj osi na tor. Tok ! Pran sa pou toué !

Justin la fé pou répons :

Mon vyé matant k’i koz touzour la boush rouvèr,
Sak ou i di, la pa pou étone amoin, ou lé touzour dann l’anbians kolonial. Astèr ou i anparl amoin in minis la gosh ? Moin osi moin la antann sa konm ou, mé li osi li bingn dann l’anbians kolonial é mèm l’anbians inpéryalis… é si tout sak la manyèr pansé lé gomé avèk l’idéolozi rasis dsi internet dann la radio, zot osi lé bienvéni. Zot osi i fé la klak pou lo mèm parti-pri. Alor ? Sa i anpèsh pa ké la shart lo zé lété violé alé oir sa in shart toulmoun té i doi d’apliké. Lo vyol la shart sé in bon z’afèr pou ou ? É bin, astèr ? Kisa i sa répar lo po kasé, kisa i sava rétabli léspri l’antant ? Mèm nou La Rényon nou lé mayé dann in n’afèr konmsa ! Alé oir in bonpé bann rényoné la donn z’ot tan, z’ot kouraz, z’ot nuit la pass dsi la késtyonn l’antant rant voizin. Tout sa i kass par bout é pa par nou é malgré nou, moin la bien pèr ké La Rényon lé riskab pi z’ète La Rényon. Tok ! Pran sa pou ou !


Kanalreunion.com