Oté

La Répiblik bann kopin é bann kokin

Témoignages.re / 23 désanm 2010

Astèr-la, la-ba dann l’Asanblé nasyonal, nana in gran sobatkoz déssi la késtyonn déklar son patrimoine. Zot i koné kan ou i gingn in zéléksyon dépité, i fo ou i fé in déklarasyon pou dir kosa ou nana é si i kol byin avèk out déklarasyon z’inpo. La fé sa, konmsa bann dépité-lé vré ossi pou bann sénatèr-i aparète konm bann sitoiyin modèl. Konm diré in piblisité déssi la lésiv, zot i lav pli blan.

Sof ké domoun, kan zot nana lo pourkoi, zot promyé éspor, avan lo golf, sé frodaz-fiskal. I prétan dir sa in éspor i raporte larzan. Sé pou sa in bon pé d’moun i fé sa. Arzout ankor sak i fé kour larzan dann péi étranz, épi sak i kour zot mèm dann péi étranz pou pa pèy tro z’inpo. Sa lé vré, an zénéral !

Alon arvir déssi lo ka bann dépité épi bann sénatèr

Gouvèrnman la déside fé pass in loi, pou kondane bann dépité épi bann sénatèr sak i fé fo déklarasyon. Zot la prévoir in l’amann épi mèm la prizon. Lo shèf l’UMP, épi lo nouvo shèf bann dépité UMP — parti lo prézidan ! — la déside koup devan pou protèz bann zéli nasyonal mantèr. Dézord dann park kanar ! Wati-watia konm di mon kamarad Patrice Threutard. Alon atann in pé, la pankor sif la fin lo match, alor i koné pa kosa va éspassé an final de kont !

Sé pa si zot i vé protèz azot, zot mèm ? Sé pa si zot i vé protèz zot dalon ?Touléka, dépi in sèrtin tan, nana konm in rotour an fors la répiblik bann kopin é bann kokin [1].

Justin

[1Konm ann tan De Gaulle-Pompidou. I fo dir Sarkoland lé in pé parèy.


Kanalreunion.com