Oté

La rode la varyété épi la divèrsité mé l’avnir va amontr anou si la pankor dépass l’èr !

Justin / 11 mars 2016

Kosa zot i diré d’in sosyété nana bon-pé z’afèr lé parèy : in lang noré arienk troi mil mo é la plipar d’tan demoun i koz avèk lo mèm kalité diskour. In zardin avèk in bonpé plant mé tré pé d’kalité, tout tro parèy inn a l’ot. Mèm lo moun i rosanm é na poin bonpé la diférans rant zot konmsi na trépé lo moul pou tir z’ot portré. Kosa zot i diré si, pars in pé i pans, nana an tro dann in n’afèr i siprime la moityé sansa lé dé tyèr. Mi pans sa i pé fé réfléshir azot sa !

Kosa zot i diré si i diminyé lo nonm z’afèr pou an avoir plis z’afèr zoli mé parèy : in pti varyété légime, in pti varyété frui, demoun mèm grandèr, shové mèm koulèr, mèm mo dann bann lang. Kosa zot i diré si i tyé tout sak désèrtin i trouv initil. Si par ébzanp i siprime la bio-divèrsité... Poitan, la bio-divèrsité sé la divèrsité dann la natire. Sé kan nana in bonpé z’afèr varyé, dann tout domen. Lé vré, lé pa vré ? Si ou i pans lé pa konmsa sé ké ou la pa bien rogard lé shoz konm k’i fo, dann lo gro, lo moiyin épi lo fin. Boudikont, la pa pars ou i koné pa rogardé ké na poin pou vréman. O-fon, nout salu sé dann la bio-divèrsité ké nou va trouv ali, ké nou va gard ali.

Mi diré sé pa konmsa ké l’imanité, momandoné la mète a fonksyoné-dizon dis-fonksyoné - Sak té tro pti la ral dési pou vni pli gran. Sak té tro gran la koup in bout pou vni pli kourt. La diminyé lo nonm koulèr pou an avoir pli zoli koulèr. La diminyé lo non varyété pou sosi é pou sola. Lo moun la vni an-nuiman, pars l’an-nuiman lé né in zour dann l’iniformité. An-nuiman danzéré, pars lé riskab mète l’imanité dann gran danzé.L’èr-la i di, lé oblizé rotourn an aryèr. La di, mé sépa si la fé. Moi d’désanm la-ba dann Pari la fé in gran konférans la-dsi. Pou do vré, sansa pou de fo ? Sansa lé ankor l’èr, sinon lé tro tar ? L’avnir va amontr anou si la pankor dépass l’èr.

Nb Avan l’èr la pa l’èr, apré l’èr la pi l’èr (in bon kozman pou la rout é pou pli tar !)


Kanalreunion.com