Oté

La rolijyon sé la rolijyon ! La konésans demoun sa la pa lo mèm shoz !

Justin / 19 novanm 2014

Matante Zélida la ékrir Justin :
Mon shèr nové, mon spès salté, rouj-de-fon dovan l’éternité, mové zèrb sé mové zèrb, bon zèrb sé bon zèrb ! Sa la touzour été konmsa, é si in pé i pans lo kontrèr, sa i vé dir ké zot i konpran pa tro bien la diférans rant sak i apèl lo bien épi sak i apèl lo mal. Zèrb dofé sé pa in bon zèrb ! Mayi sé in bon plantasyon ! Lé konmsa zordi lété konmsa yèr é sar konmsa domin. La prèv ? Zézi la fé in parabol « lo bon grin avèk l’ivré ! », konm pou di lé shoz i shanj pa konmsa. Sak i konpran pa sa, i koné pa tomat. Tok ! Pran sa pou toi !

Justin la fé pou romark :
Mon vyé matant k’i koz touzour la boush rouvèr, mi vé pa kontray aou d si la késtyonn l’évanzil. Moin lé dakor sanm ou dsi la késtyonn lo bien épi lo mal. Mi koné zèrb do fé, é mi koné mayi. Mi koné lo bon grin é mi koné l’ivré. Mé mi domann aou pou pran gard, pars sak sé in mové zèrb zordi, lé riskab ète in bon zèrb domin. Sa sé pa in késtyonn rolijyon, mé in késtyonn konésans lo moun. é bin, si lo mal zordi , té pi lo mal domin ? Si lo bien zordi té pi lo bien domin ? Mi san out tète i tourn la !
Na poin lontan in bann tète prop la déside fé disparète rézin maron. Pou koué, pars pou zot sa in mové zèrb. Mé antansyon moush a myèl i fé d’myèl avèk lo flèr rézin maron ; mèm ké avèk lo rézin maron i pé fé osi in byomas. Moush blé la tyé tout lo rézin maron é nou la pèrd in sézon do myèl dann l’ané…nou la pèrd osi l’okazyon, tèst in nouvo biomas… Konm di lo kont na arienk la kouyonis domoun i pé donn anou in l’idé dsi l’infini…Tok ! Pran sa pou ou !

In kozman pou la rout « sak i konpran pa sa, i koné pa tomat ! ».


Défoi, ou i tonm dsi in moun boushé. Ou i sèy fé konprann ali in shoz sinp mé son léspri i rofiz rouvèr in pé é li arzète la konésans. Tomat, sa in n’afèr tout kréol i koné, mèm ti marmay é pou pa konète tomat i fo out koko lé boushé vèy pa koman. Si tèlman ké pou pa konprann in n’afèr sinp i fo ou i koné pa arien, mèm tomat ou i koné pa… Fé travay zot koko d’tète, fé bouy zot matyèr griz, moin lé sir zot osi zot va trouv do koi pou dékor nout kozman an o la.


Kanalreunion.com