Oté

La roul douz mète : La pa arienk Alexandrie lé ménasé kant mèm la di !

Justin / 5 août 2011

Matante Zélida la ékrir Justin :

Mon shèr nové, mon spès salté,

Alor koméla, i fo fé pèr Kréol avèk tout zafèr : siklone li, volkan li, la grip li, moustik li, gro plui li... so kou issi, i fo Kréol la pèr rad-maré. Dépi in somènn, la radio, la télé épi bann zournal l’apré anons i sava an avoir in "oul" pli for ké tsounami 2007, pli for ké tout rad-maré la fine avoir isi dépi la nui dé tan. Séryé lo ka ! Si ou i vé pa la mèr i ral aou, pran out prékosyon par ou mèm ; La pa bézoin in radio pou dir aou ; si ou i oi lo tan lé pa bon pou fé le surf, alé pa fé. Pou moin, sa in konplo pou rann Kréol kapon* dévan la natir, é zot, bann rouj de fon, zot lé mèm konplis ansanm-avèk. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,

Eskiz mon pardon, mé mi oi pa pou koué la météo i fér ar pa son boulo. Mi oi pa non pli pou kosa lo mèr i sar pa pran in désizyon si li pans sa lé dann l’intéré la popilasyon. Sirtou si lé riskab kondane ali domin si in laksidan i ariv... Moin osi, désèrtènn foi, mon pti pé d’san i bouy kan i anpèsh bann Rényoné alé oir gayar z’afèr nana dann zot péi, konm volkan apré koulé, sansa la mèr i bate dési lo rosh, l’ékime i pète an flèr sépa konbien mète otèr. Moin lé kant mèm dakor kan i pran prékosyon é kan lo prékosyon lé rézonab. La natir lé pli for ké nou matant, épi pa toulmoun na lékipman, lantrènman, la formasyon k’i fo pou défyé ali. Plito k’in lintèrdiksyon, moin sré plito pou in lékol lo risk, pars si la poin lo risk, si na poin demoun pou vanjé, demin l’imanité sar tro mol.

Dé mo kant mèm dési la "oul" — Kréol i apèl sa osi "la roul" —, si la otèr la mèr i goumant avèk l’éshofman klimatik, la roul sar plizanpli for é va mète demoun i rès dan lé ba dann danzé. Pétète mèm pli for l’ané 2007, demoun va pèrd zot karé d’kour. La mèr v’alé ansanm. Pétète galman la mèr v’alé avèk la route, mèm san vouloir alé an-narg la mèr konm la rout litoral Didier Robert. Tout fason, ni vé ni vé pa, i fo pran prékosyon. La pa arienk Alexandrie lé ménasé kant mèm !

NB : la "roul" lé dann diksyonèr Alain Armand. « Ti-Pier va pik péroké i verdi dan la roul dési brizan » (Axel Gauvin-"Kartyé troi lète")
Kapon” i vé dir péré ; i di osi kaponèr

Justin


Kanalreunion.com