Oté

La rout an mèr I sa boust l’ékonomi an avan ? Sa lé a oir !

Justin / 10 zwiyé 2015

Moin la lir d’isi d’la-ba, la NRL i sava donn in san nèf nout l’ékonomi. Biensir si ou i mète inn-dé milyar dann lékonomi La Rényon, sa i pé pa fé in n’ot afèr ké donn in kou d’fouète nout l’ékonomi. Solman si i kont arienk la dsi, nou lé pas sové, loinn la.

Moin pèrsonèl, mi rogard lo tor in pé la fine fé par lo désizyon zot la pran san rogard lé konsékans, ébin moin lé pa dispozé donn azot in shèk an blan. Pars si apré la rout tamarin, nou l’avé bransh dsi la MCUR, dsi plizyèr lisé, aprésa dsi lo tram-train épi dsi la rout litoral Perben, sak lé sir sé ké nout l’ékonomi nora pa été dan l’éta k’èl i lé.

Zordi i vé lans in NRL, mé san bien rogard kosa nora konm konsékans dsi d’ot séktèr l’ékonomi. Va bousté, va débousté ? Nou va oir la suit, mé touléka, lo bann konsékans négativ, ni antrovoi déza avèk lo mové kou pou l’anvironeman, avèk la koripsyon k’i sava gangrène la sosyété, avèk lo bann Rastignac la fine fé z’ot l’aparisyon dsi la plas… é na poin arienk inn, mi pans.

An tou ka, sar pa in mayon dann nout vré dévlopman. In mayon dann la kroisans pétète, mé konm i di in kroisans san dévlopman. Konm in mézon la pankor fé lo fondasyon é la fine mète bèl-bèl mir dosi. Donk a sak i di la NRL i sava boust l’ékonomi an avan, moin mi réponn : « Sa lé a oir ! »


Kanalreunion.com