Oté

La rout sis voi :
Kosa i atann pou arèt in n’afèr konm sa !

Justin / 19 séptanm 2012

Matant Zélida la ékrir Justin :
Mon shèr nové, mon spès salté,
Mi konpran pa pou kosa zot, bann rouj-de-fon, i vé pa k’i fé la rout litoral sis voi èk in gran pon dsi la mèr. Moin, pèrsonèl, mi oi pa si na in n’afèr d’myé ké sa pou kontourn lo kap Bernard. Mi pans mèm mésyé sénatèr Vergoz na plis ké rézon kan li di i fo mèt la politik dé koté épi rogard l’intéré bann moun na voitir pou in rout konmsa. Pars, fransh vérité, moin lé pa si boushé ké zot i kroi. Mazine in zour, kan toulmoun l’apré palabré, lo kap i dsann é i pèz sé pa konbienn moun désou. Kosa bann kozèr va fé ? Zot va anlav lé min, é aprésa, bann famiy la pèrd demoun dan l’afèr va rès azot arienk zot larm pou pléré. Olèrk fé lo rout sis voi é an vitès siouplé. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Biensir ou lé pour le bèl-om, é sénatèr Vergoz i apiy son rin. Donk mi konpran pou kosa vou lé dakor èk lo sénatèr. Biensir li rod arienk savone la plansh lo mèr Sin-Dni pars sèt-la i vé asir dann fotèy prézidan Konsèy réjyonal. Li lé bien solidèr, touléka ! Matant, rapèl aou, kan in pé la kal lo trin, zot l’avé tor, épi so tor-la la zamé réparé. Rapèl aou ankor, kan la désid fé la rout an kornish l’androi li lé, lété in gro bétiz, é nou la pankor fini pèy lo po kasé. La kal tram-trin, é lo déga nou la pankor fine péyé. Tan k’a la rout sis voi, in bonpé d’moun bien ransényé la fine dir sa lé danzéré in n’afèr konmsa. Ekout pa ! aprésa, kan tangaj va pété, é bin lo résponsab pétèt sar mor é antéré, é sé bann Rényoné va sibi lo konsékans. Matant, rout-la, sa lé mové pou nout finans, sa lé mové pou l’indistri batiman dan La Rényon, pars sa i sava tiliz tout bann déblé, tout lo sab èk gravyé nou nana. Sa lé mové pou l’ékolozi la mèr. Kosa i atann ankor pou arèt in n’afèr konm sa ? Tok ! Pran sa pou ou.

Justin


Kanalreunion.com