Oté

La rout tamarin ? Kan Io vis i fé byin konpliman la vèrtu !

Justin / 9 novanm 2010

Dimansh, la rouvèr la route tamarin pou bann moun a pyé, an vélo, sansa an patin-roulète. In pé la di la byin spassé, in pé la di la fé in gran dézorde, in souk, in bazar. Sa i fé aryin, lé konm sa dabitide. Byinsir, la nouvèl mazorité Konsèy réjyonal va sèy ral toute la kouvèrtir pou li. Konm si par li la fé so rout-la.

In pé i vé nout dévlopman i rèss an pane
Mi pans, solman, zot la pa oubli tout lo gougnardaz l’ansyin mazorité la gagné kan li té apré débate pou réissi son projé. É mi éspèr banna va komans konprann in pé la politik Paul Vergès par raporte lo transpor, in klé inportan pou rouv shomin nout dévlopman. Mi éspèr... mé mi doute, pars pou la késtyonn dévlop La Rényon, la pa zot sizé préféré lo Didier Robert é son lékipaz. Moin lé mèm a d’mandé si in pé, an parmi, i souète pa dévlopman nout péi i rèss an pane.

I rokoné nou lé kapab !
An atandan, i rokoné la rout tamarin sé in bon n’afèr pou nou ; Sé déza kékshoz ! Rouv la route tamarin pou d’moun in zour, sé rokonète sé nou, Rényoné, la fé in gran z’afèr konmsa. Sé rokonète nou lé kapab. Sa lé byin ! Mé dizon ossi, kan banna i fé zourné porte rouvèr konmsa, san vouloir, zot i mète an valèr in gran travay Paul Vergès épi son lékip la fé. Dizon lo vis i fé byin konpliman la vèrtu.

Justin


Kanalreunion.com