Oté

La sékirité alimantèr ? In gran batay pou nou épi nout bann voizin i pé gagné

Justin / 29 mars 2012

Moin la fine di in bonpé foi, nout parti néna in program pou La Rényon. Désèrtin i di mèm, nout program i pé z’èt valab pou d’ot l’androi, pou d’ot péi. Moin la pran konm l’égzanp l’otonomi dan l’énèrzi. Sa lé bien vré ! Mi azout èk sa, si ni fé in bon propagann é si nout militan i fé bien rant sa dan zot koko, é si bann bon militan i sava di sa partou, moin lé sir pèrsone i gingn pa tap anou. Pars demoun La Rényon i sava kont zot z’intéré, pars tout la bann lé kan mèm pa boushé. Arzout èk sa, souvan dé foi, i port nout program dévlopman dirab dan zot kèr.

Alon parl la sékirité alimantèr. Zot i koné, bien manzé, sa sé in n’afèr inportan pou nou. Dabor pars ni èm manzé, é sa la pa in péshé kapital. Dézyèm rézon pars goni vid i tienbo pa d’bout, é Kréol la konèt kosa i apèl avoir fin. Mèm zordi, na demoun lé blizé alé di siouplé pou ranpli zot bouzaron. Donk, kan i di i fo la sékirité alimantèr, demoun i pé pa èt an dézakor èk nou. Kèl sékirité ? La sékirité produi nou mèm désèrtinn shoz nou la bézoin, é la sékirité fé vnir sak ni gingn pa produi par nou mèm an sifizans, é tash moiyin pa fé vni sa dépi bann péi tro loin. Pars i fo évit la polisyon, pars i fo pa non pli sa i ariv tro shèr.

Zot i pans sa lé posib ? Moin, oui. Pou koué ? Pars koméla, bann plantasyon avèk in l’agrikiltir rézoné sansa biolozik, sa i done bon rézilta. Si bann plantèr i gingn zot soso ladan, si bann z’agrikiltèr lé bien formé, si bann shèrshèr i rod dann bon sans pou trouv bon z’afèr é pa z’afèr pou fé l’tor demoun. Ni pé di galman, si nou, épi nout bann voizin, néna in bon konpagni bato pou transport marshandiz. An plis ké sa, nou lé dan l’oséan Indien : l’Afrik lé pa loin, l’Inn lé pa loin, la Tailand lé pa loin. Nout kouzin malgash lé tèr-la koté nou. Parèy pou bann z’il l’oséan Indien... Donk ni pé amèn désèrtènn shoz pou zot é zot i pé amèn dé shoz pou nou. Sa i apèl ko-dévlopman ! Donk pou rovni dsi sak moin la di an-o la, la sékirité alimantèr, sé in gran batay, mé in gran batay nou épi nout bann voizin i pé gagné.

 Justin 


Kanalreunion.com