Oté

La sékirité alimantèr pou l’avnir nout bann z’il

Témoignages.re / 5 désanm 2012

Matant Zélida la ékrir Justin :
Mon shèr nové, mon spès salté,
Vi pe dir amoin in pé kosa bann rouj de fon i apèl la sékirité alimantèr ? Mi domann amoin si zot i vé pa obliz Kréol manz maniok èk patat é anplis ké sa avèk la po siouplé. Pars, koméla, ou lé abitié ashté nout manjé dan l’Éskor. Bin lé vré, nana bann produi i fé La Rénion, mé demoun i souplègn sa lé shèr. Donk si lé shèr, i vo mié fé vnir, é si bann plantèr i gingn pa vann sak zot i produi, sa la pa mon traka, sa la pa lo traka mon bann z’amiz, sa la pa non pli lo traka sak i rod sinploman pa tro dépansé pou ranpli zot boujaron. La sékirité, pou moin, sé kan bann produi i sort déor, i sort la Frans, préférableman, épi i ariv isi konm k’i fo. La sékirité sé trouv sak i fo amoin san pèy tro shèr, in poin sé tou. Tok ! Pran sa pou toi.

Justin la fé pou répons :
Mon vié matant k’i koz touzour la boush rouvèr.
Si vi kroi sak vi kroi, é bin ou i tronp aou bonpé. Pou koué ? Pars inn foi ké bann prodiktèr déor nora fine touf nout prodiksion, é bin zot va goumant lé pri é nou sar kit pou nout biskui si ni lès azot fé zot l’inportasion konm zot i vé, san sousié nout prodiksion. Dsi la sékirité alimantèr, matant, la pa arienk nou, bann rouj, i souèt sa, é san tir bann marshandiz tro loin. Mi sort lir dann in zournal Moris, lo prézidan bann ti plantèr apré di zot i gingn ranpli o moin sinkant pour san lo panié la ménajèr Moris, mé bann batiman épi bann rout l’apré gaspi la tèr kiltivab, é si i kontinié konm sa, Moris va pran son distans par rapor la sékirité alimantèr. Sak lé vré pou Moris, pou Rodrigue é pou Agaléga lé vré pou La Rénion, pou Sésèl, bann z’il Komor, Madégaskar, é si nout tout na la sajès bien antann rantre nou, é bin, sar in konba nou va ranporté, é nout parti nora l’onèr an avoir vi klèr an promié. Tok ! Pran sa pou ou !

 Justin 


Kanalreunion.com