Oté

La sékirité alimantèr : sak nana grin d’bibas dann trou d’zorèy i antan pa !

Justin / 5 octob 2016

Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, mi antan dopi l’otro-zour zot i anparl la sékirité alimantèr. Ou i pans vréman sa lé posib ? Sansa sa ankor in spès fion pou sépar a nou d’avèk La Frans ? Pars, si mi tronp pa, la sékirité alimantèr sa ankor in manyèr pou s’anpass tout bann produi alimantèr i sort La Frans épi l’érop par konténèr pou ranpli bann sipèrmarshé. Mé nana in n’afèr zot la pa kalkilé kan zot i koz konmsa : sé la késtyonn lo ri é koman La Rényon k’i plant pa in sèl pyé do ri lé kapab nouri son popilasyon ? Sa la pa in manyèr artourn an aryèr sa ? Dizon, zot i vé fé manj kréol galé . Tok ! Pran sa pou toué !

Justin la fé pou répons :

Mon vyé matant k’i koz touzour la boush rouvèr, nitil dir aou mi pans pa konm ou. Pou kosa ? Pars dsi la késtyonn ri na poin in malédiksyon k’i pèz dési nou pou anpèsh anou plant de ri kisoi dé sèrtin z’androi konm ri dann lo, kisoi désèrtin l’androi de ri dann la tèr irigué. Nout zournal la fie anparl sa é pa arienk in foi mé na in pé nana lo mir dovin z’ot zorèy. Séryèzman, sak bann malgash i fé ni gingn pa fèr ? Sak bann z’afrikin i fé, ni pé pa fèr ? Sak bann plantèr i gingn fé in pé partou dsi la tèr, nou ni pé pa ! Anpliské sa, ni gingn fé sa an bio, san l’angré shimik, san dézèrban shimik galman, san z’inséktisid sof sak lé natirèl. Mi pans sa sré in bon solisyon pou nou.

Anplis ké sa, nou na bann rasine konm patat, magnok, kanbar é sa i pous La Rényon. Mi pans pa in moun va démanti amoin ! Nana galman frui a pin é sa la sov bonpé d’moun pandan a guèr 39-45 é sirtou k’i di pa moin na poin pyé frui a pin isi La Rényon é sa i pous pa bien… Nana banane galman : touléka nana bokou d’shoz ké ni pé produi isi La Rényon, ké ni produi déza é ké nou la déza fine planté dann lo pasé. Anplis, ké sa sa i pé ansèrv pou zanimo épi mi ardi, sa sé lo bio san-pour-san.

Sak i vé antann i antan, mé sak nana grinn bibas dann trou zorèy i antan pa. Tok ! Pran sa pou ou !


Kanalreunion.com