Oté

La sézon shipé la fine pasé ! Zot i kroi sa zot ?

Justin / 12 octob 2015

Na in kalité d’moun kréol i èm pa. Kisa solon zot ? Sé bann moun i sèy kapar out bien épi pran pou zot. Si ou I ékout désèrtin radyo sa in kalité d’moun i anmank pa sa koméla. Lontan d’apré sak i di, demoun lété pa konm koméla. Volèr té rar ! Sof kan l’avé in kourann mizèr pa rodinèr é sak l’avé fin té I sèy par tout fason ranpli son boujaron. Koméla, I vol loto, sansa bann z’aparèy éléktronik, sansa ankor l’arzan. Kisoi l’arzan privé, kisoi l’arzan piblik.

A propo d’ l’arzan piblik zot I koné souvan dé foi bann z’om politik lé mayé dann in mik-mak pa posib é I ariv azot bien souvan artrouv azot dovan in tribinal pou ésplik z’ot ka avèk lo ziz. Zistoman, koméla, nana bann polisyé épi bann ziz apré tourn konm papiyon la lanp-osinonsa moush sharbon – otour bann zéli La Réjyon.I larg pa zot ! I fouy z’ot kaz, I fouy z’ot biro, I fouy z’ot l’ordinatèr. I rod in n’afèr malonète é pa prop.

Kosa va trouvé é kosa I trouv ar pa ? Moin pèrsonèl mi koné pa, pars mi frékant pa demoun la ote. Mi di pa non pli, konm in pé i di, la poin la fimé san fé, pars défoi nana la fimé mé la poin dofé… Touléka lo fé lé pa vizib. Pétète li bril sou la sann mé i trouv pa li… Solman sak lé vré sé ké sa i fé pa ou in bon répitasyon é mèm out moun i rod in manyèr pou défilé kan ou i ariv.


Kanalreunion.com