Accueil > Chroniques > Oté
La solidarité intèrnasyonal, sa la pa kékshoz an tro. Ni doi sousyé sa toultan !
mardi 24 octobre 2017, par
Na poin lontan, dann in radyo désèrtin moun té apré domandé si nou, PCR, nou la poin asé avèk nout prop problèm épi bann problèm rényoné pou alé ankor okip nout tan avèk bann problèm lé zot. Moin la antann sa épi moin la konm santi sak - solon moin - lété in gran l’égoïsité dann kèr la pèrsone t’apré kozé.
Lé vré, ni viv dann in sosyété l’individyalis épi l’égoïsité i pran plizanplis la plas si tèlman lé difisil pou la solidarité rant le moun trouv in shomin pou alé kèr an kèr, moun an moun, pèp an pèp : si demoun lé sèr épi frèr, ni pé dir la solidarité, la fratèrnité, l’amour rant nou sé kékshoz nana la valèr é sa sé in n’afèr i doi bien kont pou nou.
Sa i vé pa dir, tazantan, mèm bann moun solidèr, i donn pa vilin kou d’kanif dann in kontra sakré. Sa i ariv, mé konm moin la fine dir si ou la fé in n’afèr d’mal, i fo ou i rogrète, épi i fo ou i répar. I gingn pa fé lo bien toultan, san pour san, mé si ou la manké i fo ou tash moiyin réparé.
Pou arvir dsi lo bout moin la komansé : dopi lontan ni di ni doizète solidèr avèk nout bann sèr épi frèr malgash. Na poin lontan désèrtin moun la anparl la réprésyon dann Madégaskar l’ané 1947. Pou kosa zot la fé sa ? Na in bonpé rézon. Shakinn dann son kèr i pé réfléshi pou kosa la fé sak solon moins é in vré manifèstasyon nout solidarité imène.
Aprésa, toudinkou, nou l’aprann nana in l’épidémi la pèst dann gran péi-la. In bonpé d’moun i s’anfoutsa. Désèrtin la di, i fo izol Madégaskar konmsa ni trap pa maladi-la isi shé nou (mèm désèrtin dépité la di sa). Mé moin la pa antann téi falé sokour nout bann frèr malgash –poitan lété pa sa k’i falé pans an promyé ? In késtyonn solidarité konm i di sa.