Oté

« La taye lo shien lé bon pou sak i èm »

In kozman pou la rout

Justin / 20 mé 2016

Na in provèrb demun déor i di konmsa : « késtyonn gou é d’koulèr, sa i diskit pa ! ». Mé nana osi demoun i di : « nana lo bon gou é lo mové gou. ».

Astèr kodsa nout kozman i vé dir. Dabor inn i fo konète koda ou i vé fé ansanm : si sé pou manzé mi konpran pa kisa i pé èm la taye lo shien. Mé si sé pou mélanz avèk la paye pou fé in fimyé la pa parèy. Mé alon rod ankor in pé plis dann fon dé shoz… Mi souvien in zour moin la antann in komik apré parl la « la pans brobi farsi » : i paré sa bann moun l’ékos i manz sa é konm zot i manz sa dopi étan pti, pou zot sa lé bon. Pou nou, mi pans sa lé pa bon ! Konm dé shoz ni manz-gèp frit, sansa sivé tang - moin lé sir na d’moun nana mo d’kèr kan i san sa.

Si ni sar dann lo fon dé shoz ankor mi pans sa i ranvoy anou ziska lo provèrb déor mon la nonm anl’èr-la.


Kanalreunion.com