Oté

La Tèr lé ron, na poinn o, na poinn ba dan lunivèr !

Justin / 17 zwiyé 2014

Mi doi alé Polinézi, zot i koné Taiti, Markiz, Touamoutou tousala ; sa lé téritoir fransé (ankor inn). Ek zot santralism pariziin, dé foi i di kolbertism kan i parl komers, konm si ni pé pa asèt ou vann koté nou, nout voizin malgas, morosiin, afrikin, non i fo ésanz ék la« métropol » ; i vé dir minm si lo bèr i vann 4 foi moin sèr Mozanbik, a non, i fo asèt sak Normandie !

Bin la mi romark po déplas a ou, pareyi ; in Guyané i vé alé voir in ansèt sénégalé, i fo arpas par Paris (Er Frans).
I plas a ou konm dan in toil zèrnié : a ou lo mous, lo papiyon, lo zarénié o santr la toil, li atann a ou po bèk a ou, a li i kontrol son bann kolonozé frankofone ; ké ou vé ou ké ou vé pa.
Rogard in kréol la Rénion ; si li vé bat in karé an Guyane (ou Martinik, ou Guadeloup), minm o Brézil ! Ti kroi sra posib alé dirèk par Lafrik du sud : inn tior.
Ta mont par Lérop (anfin ta mont ou ta désann !)

Ma pas par Ostrali, nouvél Zélann... I di na in èd Konseyi Rézional, i apèl sa la kontinuité téritorial ! Ma fé mon domann ; mé di pa moin po bénéfisi sa, i fo absoliman pas par la Frans éropéèn ; pars sort din départman fransé po alé din ot téritoir fransé, nou rés dan la kontinuité, non ?
La Tèr lé ron, lé pa ron ? Si lé ron, na poinn o, na poinn ba ; tourn a gos, tourn a droit, nou rés si nout glob ; arèt obliz a moin pas toultan par Pari ; si mi préfèr pas par Sidné, Oklann ou lé zil Kouk, lès a moin, nou lé an Républik !

Justin



Inn modékri, inn ti lavi, inn komantèr ?



Bann modékri andann forom






  • ben justin, y gaingne pas, dan ciel nana lignes aériennes bien déterminées ke ou oit

    pas, band contrôleurs y oit, nou noré dû fé zétudes la-dessus, moin ossi mi comprends

    ou, kan moin lété au sénégal, moin noré voulu bat un tit karé la Réunion, té pas loin

    mé la dit moin la point lignes aériennes po çà, "dakar - saint -denis" , çà n’existe pas,

    fodré inventé !!!! ou trouve pas ? kouk ou pé fé, ? prends out mal en patience , lé meillèr

    ké pas du tout.

    Article
    Inn modékri, inn ti lavi, inn komantèr ?


Kanalreunion.com