Oté

La tèr ? Nout momon !

Justin / 20 octob 2009

Mazine azot mèm, mazine in pé, pou sak lété pa la samdi Sin-Bénoi, in sal — i apèl sa in l’anfitéate — i sort an-o épi i plonz an-ba déssi lo plato. Mazine azot mèm, mazine in pé, toute zénérasyon, toute kalité d’moun dann so domi l’antonoir-la : marmay-li, jènn-li, grann pèrsone, z’ansyin épi sak lé déza plis k’ansyin... avèk la mizik, l’anbyans, lo mouvman, don... la vi, bon pé la vi. Déssi lo plato, i dans, i shante, i koz, i fé diskour, épi dann domi l’antonoir-la, i bate la min é bann ti marmay i fé bann "you-you-you" pou amontr zot lé kontan, zot lé la.

Samdi, la-ba Sin-Bénoi, la rékonpans bann Zarboutan nout kiltir konm i fé déza dopi sizan. La diréktris syantifik la MCUR, Fransoiz — l’ote sé Karpanin — l’apré ésplik kossa i lé Zarboutan nout kiltir, pou kossa, pou kissa i romète diplome-la, kossa i lé lo patrimoine imatéryèl... Toudinkou, la foto bann moun la gingn so dékorasyon-la, bann moun inportan pou vréman, i pass inn apré l’ote déssi lo l’ékran : domoun i bate la min, in pé i lèv doboute an réspé, marmay i fé bann "you-you-you"... In bon l’anbyans asuréman !

Momandoné, Fransoiz i trap in pti sokoup avèk la tèr La Rényon. El i pran so tèr-la dann son min fèrmé... La tèr ? zénérasyon apré zénérasyon, bann Rényoné toute kontinan... toute kondisyon... la fé viv... Konbyin an parmi la manz la mizèr, la konète l’ésploitasyon, mèm bann krime kont l’imanité ? Konbyin la mélanz z’ot san avèk z’ot transpirasyon... Lo brui i diminyé, lo batman la min i arète, konm lo bann "you-you-you" bann ti marmay... pou lèss la briz l’émosyon passé... La tèr La Rényon ! Nout tèr La Rényon ! La tèr ? Nout momon !

Justin


Kanalreunion.com