Oté

La trète épi lésklavaz, sa krime kont l’imanité : obli pa !

Justin / 4 désanm 2009

Moin la viv dann in famiy, alé savoir pou kossa, Anchaing, Cimendef épi d’ot gran shèf maron ankor, lété pou nou, inn bann konbatan la libèrté... Dann d’ot famiy té i konsidèr banna konm in bann bandi, assasinèr d’moun byin... Nout kaz, nou té i pans pa konmsa... pétète akoz mon papa té i suiv byin la politik Dr Raymond Vergès, épi pars mon momon té in l’instititris layik dopi "a" ziska "z".
Mi sort lir, in lartik zournal déssi in l’émissyon dann télé. L’avé in shantèr Gerard de Palmas, né issi a s’ki paré, épi Yves Jégo... I parétré zot dé la konm vouli apèz in pé nout l’idé déssi lésklavaz... solon zot, lésklavaz la pa mark anou dann nout shèr, konm la mark bann Guadeloupéin... De Palmas noré di galman l’avé moins zésklav é moins lésklavaz issi ké la-ba…
Pou moin pèrsonèl, listoir La Rényon, konm sète La Guadeloupe sa lé tro séryé pou dir n’inport de koi. La pa pars dann déssèrtin kaz, sansa dann la bone sosyété, i koz anlèr, la boush rouvèr, k’i fo kroir banna i di lo pli vré... pars,konm sa mèm lo révizyonism i fé son shomin... Tansyon pangar, pars i fo touzour maziné, lésklavaz konm la trète sé in bann krime kont l’imanité é La Rényon, konm La Guadeloupe, konm d’ot péi ankor, la viv in gran péryode dann so bann krime-la. Obli pa sa !


Kanalreunion.com