Oté

La tristèss é la raz dann kèr.

Justin / 8 zwin 2010

Vantrodi soir, lékip La Frans fotbal é lékip La Chine la kroizé. Rézilta zot i koné, mé la pa tèlman sa k’i intérèss amoin. Sak i intérèss amoin, sansa plito sak i rann amoin trist, sé la manyèr nou la rosovoir lékip shinoi. D’apré sak mi koné, d’apré sak moin la garde dann télé, sansa moin la lir dann zournal, mi pans nout l’akèy lété pa a la otèr.
Ala in lékip k’i sorte son gran péi, i vyin oir anou, é ni ariv pa rouv nout bra konm noré fali. Lé vré nou l’avé la shans rosovoir lékip La Frans an mèm tan. Ni koné bann Rényoné i ème lékip La Frans... la dsi na poin aryin pou roproshé. Mé bann z’ofisyèl, kossa zot la fé pou an avoir bon figuir avèk bann shinoi ? Moin na poin konésans é pé sfèr mon roprosh la pa zist… mé mi ar di sa, konm mi rossan lo z’afèr. Pétète, bann shinoi lé rézèrvé, pétète zot té i vé pa tro déranjé, mé nout bann roprézantan zot, sof mon réspé, mi pans zot la mank zot devoir. Mi pans mèm gouvèrnman fransé la pa fé son devoir. Bann minis i sava, i vyin,i voiyaz toute èr, toute rézon, é la zot i vyin pa. I oi pa zot ! I antan pa zot. I diré, zot té pa la èk sa.
Arzoute nou nana, dann nout sosyété é nout pèp arkansyèl, in bonpé d’moun zot zansète i sorte La Chine. I étoneré pa moin si zordi ankor zot na la tristèss dann kèr, par raporte de sa, pars in mank konsidérasyon pou lékip la Shine sé in mank konsidérasyon pou nout bann konpatriyote nana zot rasine dann péi shinoi. La tristèss, é pétète ossi in pé la raz dann kèr !

 Justin 


Kanalreunion.com