Oté

La vals a mil tan ! Roulé, roulé, tourné tourné, tourn kréol dann la farine Baya !

Justin / 13 mars 2015

Mi répète in n’afèr moin la fine di plizyèr foi. I paré, in zour, bann zournalis, la domann in prézidann konsèy mésyé Edgard Faure si li lé pa fatigé alé dann in sans épi dann in n’ot, tourn an ron, pik a gosh pik a droit, lo boug la réponn : « La pa lo zirouète k’i tourn, sé lo van ! »... Prézidan koméla, li apèl pa Edgard mé moin na konm l’inprésyon li koné bien la mizik l’ot té i zoué dann son tan.
Promès ? Sa sé lo kadé de son bann traka, épi konm shakinn i koné promès i angaj arienk sak i kroi, pa sak i fé…

Li la promète anou lo train, l’otonomi dann l’énèrji é tout sak nou té i vé, mèm plis : rézilta ! Li lé la dopi 2012 é nou la pankor fé in bonpé pa par dovan. Li la promète diminyé la mizèr par dé, bann kamarad Sin-Pol la mète an marsh zot kronomèt pou trap le l’objéktif é dopi okin rézilta, oki babouk. Té i doi goumant bann rotrète é zordi mi antan di i sava donn bann rotrété in prime 40 euros, pa pliské sa é mèm lo karant éro lé an stannbay, kék par dann kès l’éta..

Na rienk in ‘afèr, li aplik rèd é fèrm sé diminyé lo larzan dann bidzé, sé raz la pint kréol épi zorèy soi dizan pou diminyé la dète, alé oir... Konm di mon kamarad Zanbass sé konmsi ou i piss dann in vyolon pou tir in son. Alors, i ral dési, i ral dési, é lo bidzé i grandi pa… Astèr mi antan in son k’i di konmsa i siprime ar pa konsèy zénéral konm l’avé promète.
Konm noré di Jacques Brel, prézidan-la lé pli for ké la vals a mil tan : tourné, tourné, roulé, roulé roul kréol kari dsi d’ ri.

NB Sa i fé pans amoin in fonnkèr Axel Gauvin té i di konmsa : « Otoué Sarda, toué la roul a nou, ton zoli kozman roul anou dan la bou ». (Kan Sardal’ariv de Frans par Axel Gauvin)


Kanalreunion.com