Oté

La vérité na in sèl koulèr !

Justin / 9 zanvié 2015

Mi pans zot i rapèl kan Fransoi Holland la débark Pyèr-fon. Son promyé parol té pou dir la pa bézoin in plan éspésyal pou La Rényon vi k’i aplik isi lo mèm loi ké dan La Frans, lo mèm mézir i aplik la-ba konm isi épi i doi donn bon rézilta la-ba konm isi. La pa manké lo bon rézilta la pa arivé é shomaj la kontinyé fish an avan. Aprésa, li la fé diskour in pé par isi, in pé par laba téi amontr bien lo boug téi pran pa réèlman nout sityasion o sèryé. Aprésa, bann zournal la droit la fé sondaj pou dir lo voiyaz lo prézidan la bien éspasé é kréol lété bien dakor avèk li.

Pandan éstan-la, nou ki kriy la sityasion lé grav, pèrsone i fé pa in kont sanm nou. Ni pé dir shomèr lé troi foi pli nonbré isi ké dan La frans, ni pé dir galman nout lékonomi l’apré dégréné, pèrsone i fé pa in kont : pèrsone an parmi sak nana in pti gine pouvoir, in pti grin résponsabilité, sak i pé fèr in n’afèr pou fé avans anou in pé. Pèrsone an parmi sak nana bann pos inportan kisoi dann l’administrasyon, kisoi an parmi bann zélu, kisoi sak nana in pé lo pouvoir ékonomik… Pou so bann moun-la, nou sé in bann kriyèr d’nuit é ni mérit pa dmoun i ékout sak ni di.
Konm di l’kont, i pé dir na poinn kriz !!? Ou i pé dir tout i marsh bien madam la markiz ! Ou i pé dir galman lé pa nésésèr pran bann mézir éspésyal

Mé ala ké toudinkou, lo prézidan i mète a dir sak i fo sé in plan pou dévlop shak péi l’outre-mèr. li tir son fizy dsi in koté d’zépol, pou mète dsi l’ot. I pé dir myé vo tar ké zamé, mé afors pèrd lo tan ébin nou ni avans pa. Ala kosa i raport pa rogard la vérité La vérité na in sèl koulèr ! La vérité na tèt dir ! La vérité lé antété !

In kozman pou la rout : « Atèl lo dyab sanm son karyol »


Sa in kozman i vé dir, ou l’apré rode l’annuiman pou out kor, rod malèr pou ou mèm. Sa lé bien vré pars, dan la vi, i oi toultan demoun apré fé in n’afèr pou fé annui ali. D’ot i oi lo konsékans, mé l’otèr, li pèrsonèl, li oi pa sak lé riskab arivé. Sa lé vré pou dmoun rantre zot, sa lé vré pou bann ti kolon, sa lé vré pou bann gran désidèr. In légzanp : in pé i di : « Didier Robert l’apré fé in rout dann lo, san kalkil lé konsékans ». Parl pi si la mèr i fou in kou d’radmaré épi i kapote la rout dan la mèr. V’ariv mèm shoz konm kan bann marmay té i shant : « Dsi l’pon di nor ! »… lo pon la éfondré.… Fé travay zot koko, fé bouy zot matyèr griz, zot va oir rant-rant ni pé ète dakor rantre nou...


Kanalreunion.com