Oté

La vérité na in sèl koulèr !

Justin / 15 zwiyé 2015

Matant Zélida la ékrir Justin :

Mon shèr nové, mon spès salté, rouj de fon dovan l’éternité,
mi pé dir aou, moin lé kontan. Ou i koné pou kosa ? Pars Virapoullé la artonm dakor avèk mésyé Didier. Sé mèm li ké l’apré ékri lo program ékonomik la list la droite. Pou kèl rézon ? Pars li oi ké la méyèr shans pou la droite sé mésyé Didier é ké sé konmsa ké la droit va rantré. Pars lo méyèr konésèr l’ékonomi La Rényon sé mésyé Virapoullé é ké késtyonn z’idé i anmank pa li. Pou anshèv èk sa sé lo pli séryé z’enmi bann rouj de fon. Tok ! Pran sa pou toué !

Justin la fé pou répons :

Mon vyé matant k’i koz touzour la boush rouvèr,
i étone pa moin d’ou in n’afèr konmsa. Mé konm di lo kont : kozé lé bien, mé koz vré la pa lo mèm z’afèr. Virapoullé ou i di ? Sa sé pa lo moun la trayi bann plantèr kann avèk son protokol favorab pou bann z’izinyé. Virapoullé ? Sé pa lo boug la mèm pa gingn aménaz in bon santre vil dann sintandré ! An plisk sa, li lé pa avar pou fé prozé, mé la poin inn k’i ariv o bout. Lo méyèr sé l’otèl flotan lo park kolos ! La fini an lo d’boudin, mé la pa anpèsh ali ar di sa dann shak zéléksyon. Arète èk sa matant, ou i oi pa sa in politik zèf klèr : i kouv, i kouv, zamé i éklo. Tok ! Pran sa pou ou !

Matant Zélida la ardi ali :

I koz pa malonète konm sa ! I fo rokonète sak in moun i fé kant mèm é sak i rokoné pa travay Virapoullé, ébin li rokonète pa la vérité ! Tok ! Pran sa pou toi !

Justin, pou fini èk sa :

La vérité na in sèl koulèr matant : sé lo rouj ! Sa la pa koulèr la droit ! Sa la pa non pli la koulèr Virapoullé. Tok ! Pran sa pou ou !


Kanalreunion.com