Oté

La vi lé shèr, koman fèr ? Pou ma par, mi oi pa !

Justin / 22 décembre 2010

Matant Zélida la ékrir Justin
Mon shèr nové, mon spès salté,
Mi domann amoin kosa bann rouj-de-fon nana ankor pou alé ravaj demoun dann bann grann boutik, kosa zot nana pou alé kriyé, wati-watia la vi lé shèr, kréol i an pé pi, étséra-étsétéra la ké lo ra ? La vi lé shèr ? Oui konm pa ! I oblij pa l’moun alé ashté sak lé shèr, lé shoj k’i dépass zot kapasité d’porte-moné. Si in moun la konm anvi ashté toute sak i ral ali, mèm si lé shèr, i fo li ariv pa o-bit. Sa sé d’moun lé pa rézonab, dann son dépans famiy, k’i koz konm sa ! Tok ! Pran sa pou toi !

Justin la fé pou répons
Mon vyé matant k’i koz touzour la boush rouvèr,
Lé proférab antann aou, plito k’antann pa zorèy. Matant, sa ské ou i di, sa lé konprénab par toute demoun sa. Lo kréol i sava pa rode l’inpossib. Tro bon marshé lé danjérab ! Si sé in boute la vyann, ou i koné kosa nana la-dan ou ? Ou i koné si zanimo la pa manj médikaman pou kontraye out kèr, out foi é tout lo tranbléman ? Kan ou i ashète in n’ot kalité marshandiz, ou i méfyé k’sa i done pa ou la gratèl ; Ou i méfyé k’lo, lizine la pa mète poil-a-graté la dsi ! Tro bon marshé lé riské ! Tro shèr i aplati lo porte-moné ! Zzis k’onm k’i fo lé rar konm korn lapin ! Alors, koman fèr ? Pou ma par, mi oi pa !

Justin


Kanalreunion.com