Oté

La vitès na son tan ! La rofondasyon i fé pa an in zour !

Justin / 23 avril 2012

Sof mon réspé, mé kan ou i fé la politik, dann bon sans mo-la, i fo ou na z’idé. Sanm pou moin, kan ou i fé la politik, touzour dann bon sans, isi La Rényon i fo ou nana z’idé. Z’idé pou kosa ? Pou La Rényon i ansort ali. Sa i vé dir, pou trouv solisyon pou règ tousa problèm nou nana pou réglé. Mi sar pa grinn sa konm shaplé, mé mi pans, tout demoun i koné bann problèm-la — touléka, tout demoun i sousyé in pé pou nout péi, pou bann Rényoné.

Parti kominis nana z’idé ! Pèrsone i pé pa di lo kontrèr. Li nana si tèlman z’idé ké ou i antann partou di son program san di kisa la trouv program-la. Pétèt in pé dmoun la zamé lir son program. Pétèt in pé i mazine zot i koné san tro lir sak li pans, sak li di, sak li ékri... pa arienk dopi yèr. Mé koman koman, sé in n’afèr k’i pas dan l’opinyon, mèm si bann télé, bann gran zournal i done pa li la parol, sansa i déform son parol. Pars sa sé in n’afèr, i arsanm lé a la mod, an parmi bann moun i pans zot i fé l’opinyon.

Lé bien bon ! Mé kan i done la parol Sarkozy dsi La Rényon, sansa Bayrou, sansa ankor bann Vèr i sort la Frans, kosa zot i di konm trètmann fon pou La Rényon ? Zot i di program Parti kominis rényoné. Kèl program ? In program i mèt ansanm lo sosyal, l’ékonomi, la kiltir épi la défans l’anvironman. Moin la pa parl lo kandida Hollande, avèk Mélenchon, mé moin la ékout azot é zot i parl program-la. Nout parti la mèm propoz azot in kontra pou apliké ! Donk ala in parti li na in program rokoni konm bon par bann moun i fé travay in pé zot tèt, kansréti in pti pé ! Biensir, li la bézoin in pé lo soin... sak Elie Hoarau i apèl rofondasyon.

Bien antandi, sa i fé pa an in zour, pars fé an in zour, sa i apèl baklé, é nout péi épi nout pèp la pa bézoin z’afèr baklé. La vitès na son tan.

Justin


Kanalreunion.com