Oté

La vizit Marine Le Pen : Non va ! Li la pa in kandida konm in n’ot !

Justin / 9 févrié 2012

Bien antandi, dépi sak la éspas térin l’aviyon mardi, Sin-Lui épi Sin-Lé, bann moun i mèt a jazé dann radyo wati-watia. Si in pé i koné kosa i lé lo Fron nasyonal épi sak zot i roprosh ali pou vréman, nana in bonpé d’moun lé pa kontan pars pou zot, té i falé lès madam Le Pen fé son tourné konm èl té i vé. Désèrtin i di, èl lé in kandida konm in n’ot, donk afèr mèt zanbèk konmsa dann son program ?

Pars zistoman, Fron nasyonal la pa in parti konm in n’ot. Sa in parti lé bien dan la tradisyon l’ékstrèm droit la Frans sak lé kont bann z’étranjé, sak la done la min Hitler kan la okip la Frans, èl lété dakor pou tout bann guèr kolonyal. Plot avèk bann z’idé rasis, sa i zène pa li ditou. Rapèl azot, li ronyé mèm sak i apèl l’olokost, dizon li lé négasyonist ! Rapèl azot ankor kan Le Pen té i parl bann shanm a gaz konm in détay l’istoir ! Aprésa, li avans maské, li fé kroir demoun li lé la pou défann lo droi bann pov, li rakont demoun sé la fot bann z’émigré si lo péi lé dan l’éta k’li lé, é pou sa, i jène pa li done kou d’pyé dan la vérité. Si i pé klas bann parti suivan zot santiman, i pé di, Fron nasyonal, sa in parti nana mové fon pou vréman, é li lé bon pou zoué avèk l’ignorans demoun !

Claude Hoarau i di, La Rényon sé in péi z’imigré é sa lé bien vré. Arzout èk sa, tout nout l’istoir, nou la fé in l’éfor pou rékonsilyé lé z’inn avèk lé z’ot, lo bann nouvo moun k’i ariv avèk bann z’ansien, é i pé dir nou l’ariv in sèrtin l’antant dan nout popilasyon. Mèm si défoi lé shoz i sava pa vit konm ni vé, mé avèk lo tan, lé shoz i aranj. Mou sé in pèp tou koulèr é sé just rézon nou lé fyèr d’sa. Ni souèt mèm, si lé posib, ansèrv in pé modèl pou lé zot. Alor, kan in mové jéni i débark d’in gran zoizo an fèr pou mèt dézord dann sak nout pèp la nyabou konstrui, li pé pa fé sa èk nout konsantman. Lé blijé dir ali, nou lé pa dakor èk sa. Lé blijé dir ali, li la pa in kandida konm in n’ot ; lé normal ni pé pa manz dé grinn sèl èk li !

NB : Kan mi pans bann "gran kominis Sint-Sizane" la gingn bon kèr soutien èk banna ! Kan mi pans galman lo parti d’Sarko k’i ésèy an misouk pran pou li lo bann mové zidé !

 Justin 


Kanalreunion.com