Oté

La vyolans kont bann madam : I fo fini avèk in sosyété d’barbari konm sa !

Justin / 16 mé 2013

Mi souvien, na in bon koup de tan, bann fézèr lopinyon té i di, La Rényon i bate tout rokor késtyonn la vyolans kont bann madam, késtyon vyol épi arsèlman, épi tout sort z’afèr mové. Nou pti galé dan loséan, nou té i bate rokor. Si tèlman ké moin, konm d’ot, l’avé fini par pran sa pou larzan kontan, pou in n’afèr pli vré ké vré. Donk, lé zot l’avé la shans viv dann in bann péi pli méyèr, pli kalm ké nou, pli réspékstyé la pèrsone imène.

Poitan, afors lir zournal, afors rogard télé, ékout bann zournal parlé, moin la fini par rann amoin kont, la vyolans dann ménaz, la vyolans kont bann madam, lo arsèlman, tousala nana partou, é dé foi an pli sovaz ké nou isi. In légzanp ? La-ba dan l’Inn, in bann demoun la vyol in étidyant dann bis, é apré lo madam lé mor. In n’ot légzanp ? Lo bann tournant dan bann sité an Frans. Parl pi sak i éspas dan bann péi i nonm zot nom dan l’aktyalité pli souvan ké zot tour.

Tousa pou dir, bann fézèr lopinyon, i fo kant mèm pa tro noirsi nout tablo épi blanshi sète lé zot. Biensir, bann z’afèr konm sa nana La Rényon. Biensir, soré bon trouv la solisyon k’i fo pou diminyé bann krime lé fé isi, épi lo bann krime lé fé dann d’ot landroi. La pa in léskiz pou nou. I fo ni lite kont sa, i fo lo pouvoir i pran so bann késtyon sèryèzman... in gran batay pou améné avèk lo moiyin lo pli éfikas posib.

Nana lo bann téknik k’i fo. Nana tout in larsénal lo droi, mèm si sa i doi zète ranforsé. Nana la moral pou fé pass dan la tèt demoun. Touléka, i fo ni sèy fini avèk in sosyété d’barbari konm sa.

Justin


Kanalreunion.com