Oté

La vyolans lé pa in bon métod l’édikasyon !

Justin / 19 novanm 2009

Matante Zélida la ékrir Justin :
Mon shèr nové, mon spès salté, alor éstèr, in pé i vé pi in momon i koriz son z’anfan ! Mèm zot i vé k’i kondane lo paran i donn in batlavé son marmay... i parétré, sa sré konm in déli. Pou moin, pèrsonèl, mi pans in bon volé i pé byin armète droite in z’anfan apré pous torte. Mé na in pé i konpran pa sa... Mi diré plito k’sa la fé anou d’byin. Alé, kontinyé azot ! kontinyé mèm ! apré zot sar étoné si lo mond i sava pli-zan-plis an dégréné. Ankor in mové bon l’idé ! In l’idé bann rouj-de-fon, sirman. Tok ! Pran sa pou toi !

Justin la fé pou répons :
Mon vyé matante k’i koz touzour la boush rouvèr. Dabor, m’a souf dann out trou d’zorèy ké sé in madam, dépité UMP, la domann k’i intèrdi "la fessée". El la tor ? El la rézon ? Lé pa fasil pou fé in shoi konmsa. Sak mi koné, sé k’in bon pé marmay la gingn lo kou avèk z’ot famiy, é kan zot la grandi, lo moun la romark in pé la pous droite, in pé la pous torte... Sa lé vré galman pou bann z’anfan la pa gingn lo kou... Mé dizon, kan in momon, sansa in papa, i tap son zanfan, li manyé la vyolans, é la vyolans dann in famiy i vé dir l’éshèk dan la rolasyon, é toute la famiy lé pèrdan... konm kan in mari i tape son madam, konm kan bann z’anfan i batay rantre zot. La vyolans la pa in bon métod l’édikasyon !

Justin


L’ésplikasyon inn-dé pti mo :

In batlavé : in koréksyon, in volé

An dégréné : an dézorde, i dékaniy firamézir

In mové bon l’idé : "une fausse bonne idée"

In pé i pous droite : i vyin bon moune

I pous torte : i vyin mové moun


Kanalreunion.com