Oté

La zoumba dann z’il shagos san bann shagosien bien antandi !

Justin / 17 novanm 2016

Zot i koné Olivier Bancoult lé la Rényon pou inn-dé zour. Olivier sé lo shèf bann réfizyé shagos é li la pran dsi son tan pou vnir oir anou in pé é pou anparl anou koman son konba i déroul, pars isi shé nou bann shagosien nana bonpé z’ami é bonpé soutien dann z’ot lite. Kan ou i koné koman l’Anglétèr la maltrète azot, si ou nana in pé lo kèr épi lo santiman, ou i pé pa dir out kèr i singn pa kan ou i koné koman la mète azot an déor z’ot gayar péi épi koman la larg azot dsi lo ké Por-Loui san soutien, san léspoir, san in toi dsi z’ot tète éin gamèl manzé dann z’ot tant trésé, san travaye épi san soin pou z’ot zanfan épi bann vièy pèrsone.

Pli pir, si zot la poin lo droi rotourn shé zot, nana d’ot i profite z’ot gayar péi : nana bann solda i griy z’ot lonbri dann solèye, nana bann z’ouvriyé la baz k’i bénéfisyé lo bon èr épi lo bon klima, nana ankor bann voiyazèr dsi bato d’liks k’i trène dan la zone plizyèr moi d’suit. Arzout èk sa nana la zoumba : in zoumba zéan pou bann solda épi bann z’ouvriyé dsi la plaz Diégo-Garcia. Bann shagosien la di amoin sa sé konm in vyol pou z’ot pèp i gingn pa profite l’androi zot lé éné. Arzout èk sa, kan la dans lé fini, i fé in barbékui zéan, i manz konm koshon, i sh.. konm kanar é i psss konm torti.

Na in ga la di amoin kan li pans sa ké la spasé lo dé séktanm 2016 lo gou lo san i vien dan son boush, l’anvi donn la mor, épi la la ène a pa savoir koman apèz z’ot kèr. Péi martirizé ! Péi ésploité ! Péi volé ! Péi ralé dann la malizé ! Pèp martirizé ! Pèp ésploité ! Pèp méprizé ! Pèp vyolé dann son droi ! Pèp tréné dann malizé ! Bondyé, di amoin solman ziskakan z’ot martyr la pou dir ankor ? konbien zoumba épi bann barbékui san bann shagosien dann z’ot péi pèrdi.


Kanalreunion.com