Oté

Lang kréol La Rényon
Mon kèr lé konm in kaz, son porte lé rouvèr

Justin / 20 out 2010

Sominn dèrnyèr, Laurence, prézidante lasosyasion Tikouti la partisip in lékol kréol pou bann paran. Sa lété roganizé dann Port, lékol Raymond Mondon. In bann paran anndan, dé kontèstatèr dovan la porte. I di azot rant, konmsa zot va oir kossa i lé in klass kréol : « Non ! Zot i vé pa rantré, pars zot lé kont ». Sé zot loi. Dayèr, zot té i fé aryink passé... zot lé près pi la, zot lé pi la... Dann la klass bann paran-in bon kantité ! Lé la. Zordi sé zot le bann zélèv. Zot i vyin oir koman i fé lékol kréol pou zot zanfan.

Dakor ! Zot lé dakor ! I pé koz kréol san an avoir la onte. Dakor ! Nout lang i pé byin ansèrv kékshoz dann la formasyon, lédikasyon épi linstriksyon bann marmay. Sa i pé rann azot byin intélizan, byin dann zot po. Zot lé byin ! Byin dakor èk zot mèm ! Byin dakor avèk zot rasine !

Gran sominn pou Laurence. Sominn-la èl la maryé avèk Axel, an kréol siouplé (an kréol é an fransé ossi) dann la méri Sin-Lé. Zot la maryé an kréol dann légliz Sin-Pol, épi zot bann dalon maryé d’amour avèk nout lang la fé la fète pou zot. Zot i vé lo méni ? Séga, maloya, paté kréol, mayi, kari kanar, zashar... patati, patata, gato patate...

Konbyinn tan pou ariv ziska la ? Konbyin lénèrzi ? Konbyin la rézistans ? Mé zordi nou lé pa la pou arproshé. Pou mon par, mi flote in pé dann mon vir-vir, é mi koné pa pou koué, mi pans nout lang kréol épi, an mèm tan, gayar shanson Nicole Dambreville k’i di konmsa :“Mon kèr lé konm in kaz, son porte lé rouvèr, moin la pi pèr tangaz, moin la pi pèr mové l’èr”. Fransh vérité, pou nout lang kréol, mon kèr lé konm in kaz, son porte lé gran rouvèr.

Justin

NB : mardi sominn passé, Laurence Dalleau, prézidante Tikouti, èk Axel Gauvin, prézidan L’ofis la lang, la maryé. In gran bonèr pou zot, in gran bonèr pou nou.


Kanalreunion.com