Oté

Larzan fasil, in diksyonèr la koripsyon an Frans

Justin / 6 mars 2014

Kan oui pans liv la té ékri na 20 tan ! I diré zordi.
Larzan lo ner la gèr ; François Mitterand, li la favoriz lo sistèm ou li la pérmèt fé konèt lo zafèr si la plas piblik ?
Tous pouri ? Pa si tan ke sa.

Mé systèm la zistis lé télman konpliké ; sak i koné tourné déviré ladan li an sort a li ; sak lé tro naif ou tro néglizan va fé trap a li ; na in léksprésion i di « pa vu pa pri ».
Kan ou na ziska in ziz konm Thierry Jean-Pierre (salapa -lété pa-in Rényoné ?-) i organiz in lasosyasyon po pa kamouf bann zafèr zidisièr, lé oblisé abandoné, maltrété po « kanbriolaz zidisièr ou ékipé sovaz »pars li la vouli fé son travay perkizisyon…

La dan so bann zafèr, oplis ou lé koni,o plis ou lé anlèr médiatikman –dépité aou, mèr aou, minis, ziska lo prézidan, o plis lo milion détourné i ogmant.
Sa i fé pèr bann zinn i vé rant dan la politik ! Koripsyon, pas-droi, désoud tab, marsé okult, fos faktir, déli dinisyé, « pantouflaz », larzan-roi i doviin arzan fasil.
La tout milié i pé èt konserné : batiman, santé, zistis, politik, zournalis, notèr, finans, spor.

Moin la parl a zot lot zour Gaston Flosse an Polynézi ; zot i rapèl Bernard Tapie dann foutbol l’Olympik Marseiy !
Parti sosialis , RPR, UDF, bokou d parti la été tousé de pré ou de loin !
Na in pé koupab i préfèr disparèt ; i sar rod a zot ziska an amérik di sid…
Pli zoli, sé lé rékonpans ; po fé giny a ou in marsé si in napèl dof, mi aksèp in voyaz sésèl, ou déklar sa an fos faktir ; lo tour lé zoué !
Larzan fasil ! Fo fèr l’ENA po fé dzafèr pareyi ! Tré pé po moin !

 Justin 


Kanalreunion.com