Oté

Larzan i riskab èt kourt !

Justin / 17 octob 2015

Gramoun lontan i di “i ashté zamé in volay dann in tant vakoua“. Ou wa pa si lo poul sé in poul dolo, ou koné pa si sé in poul péi, i pé èt in bon kok la rass, in bon kok léspèss, mé i pé èt osi in vié kok valé. Pou mwin fo akout gramoun, la d’si gramoun na rézon. Sanm pou mwin la rout litoral pou nou, lé konm si ni ashté in poul san war. Déza fo tonm dakor d’si lo pri, konm kan ou fé in kaz, lo pri i débord touzour kiswa in dis pour san, kiswa in vin pour san.

A lèr kilé pou la rout litoral banna la prévi an gro 1 miliar sis san zis pou 12 km la rout é la zordi mi antan i di la pa prévi pou la rantré é pou la sorti. Déza pou 12 km i roprézant 133 million éro lo km é i fé 133 mil éro lo mèt. Konm diré in limoriss “lé pa doné voui“. Lé espésyaliss i di pou fé la rantré é pou fé la sorti i fo o mwin si san million an plis. Pou lèr, oki bourik pou lo si san million. Oila poukoué néna tousala géstikilasyon d’si la rout.

Oila poukoué néna i kri a léskandal. Oila poukoué boudikont, sak i fé pou vréman lé kont, la kour dé kont li minm, i di o final sinploman la rout va kout o ba mo konm li di li minm, dé miliar son tousèl san parl lantré èk la sorti zis pou lo milié. Inn la di a mwin “léta èk lorop i donn larzan zordi a kondisyon domin la rézyon i invésti dann lénerzi prop“. Mé kan sar finn mèt tout dan la rout, kan variv lo tan po fé ot shoz, larzan i riskab èt kourt.


Kanalreunion.com