Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Larzan pou vanj kont Ebola ? Bann sharjèr d’lo !

lindi 20 octob 2014, sanm Justin

Na poin lontan la kominoté internasyonal la réini in kou épi la di,
par raport so maladi, ni sar prann in pé lo toro par son korn. Aprésa
la fé in kominiké, épi la di zot la fé in tour la tab épi la désid donn
vin milyon dolar pou lite kont so vilin maladi-­la. Aprésa lo tan la
pasé é la maladi la trap in bonpé dmoun ziska tyé in bon kantité.
Donk la maladi i vé pa disparète tousèl : orozman nana larzan
intèrnasyonal, i fé dé shoz avèk larzan !

Kèl fé ? Kèl shoz ? Mi sort antann dann radyo frans­inter, dsi tout
larzan la promète, na arienk san mil dolar la rantré é ankor sé in
sèl péi la vèrs son kot­par, sé la Kolonbi. Bravo bann péi rish, bravo
bann gran prométèr ti donèr. Mi dout pa ké konmsa la maladi va
gingn in bon kou d’rès trankil... Mé mi sort aprann la kominoté
internasyonal i bouj épi i sar fé in gran rényon pou trouv lo moiyin
k’i fo pou bate maladi-­la atèr. Sirtou ; a ski paré, an amérik na in
vaksin pou sa. Ebola, ton kont lé bon, bann péi rish i sar fini avèk
ton ras.

Ptète so kou isi, va promète in milyar. Pars banna noré tor ète
ékonome an parol, vi k’aprésa i réspèk pa é lo kozman la boush
rouvèr sa la pa in bon moiyin pou kominiké. In bon moiyin pou
moiyéné ! Bann sharjèr d’lo va !


Inn modékri, inn ti lavi, inn komantèr ?

signaler contenu


Facebook Twitter Linkedin Google plus