Oté

Lé dur po dir : « mi koné pa lir, mi koné pa ékrir »

Justin / 17 zwin 2014

In boug dovan ou, oui koz ék lu, oralman konm sa, si li di pa ou, oui pé pa konèt si li koné lir ou pa, si li koné ékrir ou pa ! Lé pa ékri si son fron : « ilétré, analfabèt » !
Lot zour la, navé in asanblé ban Chagosiens egzilé, o Por.
Zot i koné Chagos sé in bann zil té apartien la Grande Bretagne o mèm tit ke Moris. Dan lé zané 60, avan minm lindépandans Moris, lé zamérikin (mi parl bann Kennedy, Bush é konsor) i domann bann Britanik prèt a zot Diego Garcia, inn il dan larshipèl, po zot instal in baz militèr, koté Proch Orian, Moyin Orian.

I fout Chagosiens déor ; zot i fane Moris, Londres, Réunion, anfin in pé partou.
Na a pé pré 50 tan, bann komité antrèd, ék son prézidan aktièl Olivier Bancoult i rod in manièr artourn dan zot péi : laba, zot na simtièr, zot zansèt lé antéré ; zot i vé pi viv dann zimèb Moris, mé rotourn sou zot kokotié, arplant in ti pié mai, in ti pié salad, piman a tèr, rouv lékol po bann zanfan, mèt dispansèr po bann malad, bann rout po roulé, tout zinfrastruktur politik,ékonomik, kiltirèl dobout, po in dévlopman dirab, in lavnir.
An kanpagn éléktoral isi, nou la fé in rényon la kaz in fami Chagosien ; nana lo papa, lo fi, son 3 zanfan ék son mari.

Mi rankont lo papa lo matin, li na 58 tan ; li la kit Chagos li navé 8 tan ; mi di a li :
« A swar ni sar lo Por ».
A li, dakor ; mi lès a li linvitasyon ; marké zédi 12 ziin ; mi ariv laprémidi po alé, son fi i sort travay i di a moin son papa la konpri té po samdi ;
Mi di a èl : « ben moin la lès in konvokasyon ; lé marké zédi ! »
El i di a moin : « oui, mé li koné pa lir ».
Li noré pi dir a moin ; mé lé vré, lé dur dir in moun : « mi koné pa lir, mi koné pa ékrir ».

Justin


Kanalreunion.com