Oté

Le gob lété prèské parfé !

Justin / 29 avril 2010

Si zot i rogarde moindroman la télé, sansa si zot i ékoute la radyo, moin lé sir zot la antann parl lo madam bann polis la mark ali in prosé vèrbal, pars li té i amène son loto avèk in voil dépi an-o ziska an-ba, avèk zis in léspas pou agarde shomin. Lo madam la di li pèy pa prosé vèrbal-la, pars pou èl, èl i oi byin shomin é li pé amène son loto byin konm k’i fo.
Sa té i tonm byin pars gouvèrnman i vé fé pass in loi déssi la burka an vitèss, vi k’li la gingn in batlavé dann zéléksyon épi li vé pomp a son avantaz lo bann voi lo Fron nasyonal.
Mé gouvèrnman i vé alé pli loin. Donkalor, li obli lo madam pou li intérèss lo ka son bononm. Ala k’i di lo boug nana kat fanm épi douz zanfan. Ala k’i di lo boug lé poligame. Ala k’toulézour i azoute in paj dann liv boug-la. Talèr i di li la tape in fanm. Talèr i di lo granmèr i gingn pa oir son pti zanfan pars l’apré aprann Koran. Ala k’in bann malfondé i kass son komèrs.
Tousala, la polis i trouv vite… tèlman vite ou lé a d’mandé si dossyé-la té pa fine byin préparé dépi in bon koup de tan, si té i atann pa difiz sa pou lans la loi déssi la burka. Mèm, ou lé a d’mandé si la pa arète lo fanm dann son loto éksopré pou fé pète lo z’afèr dann zournal.
Demoun i di souvan, sak i vé tro prouvé i prouv pa aryin. Bin nou lé dann in ka konm sa… "lo gob lété prèské parfé !".

 Justin 


Kanalreunion.com