Oté

Lé konm sa é pa otroman !

Justin / 30 mé 2015

Pou zéléksyon rézyional mwad désanm sèt ané tou lé zour néna inn an plis pou déklar son kandidatir. Néna sak i roprézant in parti, kiswa in parti d’gosh, kiswa in parti d’drwat, néna sak i roprézant pa pérsonn i vyin zis pou fé la mass, pou rod inn ti plass bordaz. I prétan néna osi sak i mazinn lwin, i vyin ziss pou fé présyion si désertin pou plitar. Koman in momon poul i pé trouv sonm ti andan la ? Zot i koné lo zé d’kart, kart rouz, kart nwar ? Lo batèr i anbrouy lo léspri domoun é o final do kont, souvan-dé-fwa sé touzou lo minm ki gingn, lo batèr èk bann konplis.

Minm si lé in pé difisil mi ésèy argard in pé otour é dan lé zalantour pou byin konprann. Ziska ozordi, si ni fié si la rimèr, i prétan lo parti sosialis na pwin lintansyon prézant in kandida pou mwad désanmm. I prétan, touzour solon la rimèr touzour, i prétan sé in madam an déor di parti ké va kondui la lis. Mi poz a mwin inn dé késtyion, koman sfétil kin gran parti konm lo parti sosialis, li néna sink dépité, li néna sénatèr, li néna mèr, li néna konséyè ? Mi parl pa prézidan, gouvérman tousala. Koman sfétil pou vréman ?

Ankor li mèt a li dérièr in lokomotiv i pé konprann. La sé pa lo ka, néna i ri soukap, i di konm sa la kandidat i roprézant pi aryin, èl la pérd zéléksyion dérnié tan é an plis, lo bann kandida kèl la soutoni la pérd osi, alorss désertin i domann poukoué i kour dérièr lo madam. Sanm pou mwin, konm banna i nyabou pa pran in désizyon son tousèl, é konm lo promié minis i vyin byinto, mwin lé pré a paryé lo promié minis va mèt tout dakor, konm i di li va drèss lo bor. Lé konm sa, kan sé Pari ki désid, lé konm sa é pa otroman !


Kanalreunion.com